[愛情無限loop] 就係咁，我做左女神一年既備胎: ２４５　知道了

我極力地同能蟹佢打眼色，但佢好似ＧＥＴ唔到我既意思，「你對眼有事就去睇醫生啦。」佢講完呢句後我望向左阿琪，見到阿琪只係微微咁低下頭，我都見到阿琪而家既表情係點。

而能蟹就繼續問：「果日點啊？我問你啊？」

我真係唔知點講，你叫我點可以係阿琪面前話比佢聽，一直同佢咁好朋友既佢地，會係背後講佢既壞話。

但係，而家唔到我控制，因為講既人係能蟹，而且能蟹仲係唔知道坐係我地旁邊果個就係阿琪，「果日ＪＵＤＹ佢地約左你出黎，傾阿琪ｄ野，你唔會以為無啦啦會有個男人走出黎話係阿琪既未婚夫係正常既事掛，我地幾個都覺得阿琪一直瞞住我地好多野，甚至覺得佢係出面有好多咁野既男人為佢好添啊。」

「就係你先前同我講果個收左好多兵既女仔？」能利問能蟹。



「係啊，阿牛都係其中一個啊。」能蟹話。

「阿琪無咁樣做過，你唔好咁講佢好唔好。」我話。

「邊會有兵覺得自己係兵先得架，你做左唔知姐，當局者迷旁觀者清，我地幾個都覺得你而家中晒阿琪既迷藥添啊。」能蟹話。

「個女仔好靚架？又會有咁多人為佢好既？」能利又問。

「唔算係絕色美人，但都算有少少姿色咁啦，但當然就無妳咁靚啦。」能蟹講既時候仲借機會讚能利。



「你口花花啦你。」能利話。

「阿牛，我真心覺得如果你繼續同阿琪咁樣，只會……」「夠拿！」我忍唔住大力咁拍左張臺一下，然後望住能蟹話：「你講邊個都得，但就係唔可以講阿琪。」

「阿琪真係迷得你好緊要，我地幾個都話佢並唔係你既女神，而係你既魔女……」「唔好再講拿！」我捉起左能蟹望住佢，而能利見到我咁，就即刻推開左我話：「你咁惡做咩ｗｏ，我男朋友都係為你好咋，能蟹，你朋友都唔領情，我地走。」

就係咁，能利就帶走左能蟹，呢個約會就係一個不知情既情況下完結。

本來出黎係想幫能蟹哄返能利，雖然能利最好無嬲都能蟹，但就搞左另一件麻煩既事出黎。



能蟹佢地走左後，我第一時間坐到阿琪既旁邊，佢戴得好低既帽遮住左佢既樣，我無法睇到佢而家既表情，但我可以睇到，佢既眼淚已經流左出黎，滴左落佢既褲上面。

我雙手捧住阿琪塊面，「傻豬唔好咁啦。」我用最溫柔既語氣同佢講，而當我見到阿琪既正面時，已經見到阿琪喊到對眼好紅，但係佢堅持唔喊出聲。

我擦一擦佢既眼淚然後話，然後佢就話：「點……點解……點解又要發生呢ｄ事？」

佢口中所講既果ｄ事，應該係以前都有發生過類似既事。

我好憐惜咁同佢講：「我都仲信妳架。」

呢一刻，其實我唔知咁樣講對阿琪有無幫助，我只係知道後來既阿琪都一直喊緊。