[愛情無限loop] 就係咁，我做左女神一年既備胎: ２３９　能蟹既改變（手殘唔記得CLICK公開= =）

七三廿一同拾拾既ＱＵＩＴ　ＧＲＯＵＰ，都令到跑ＧＲＯＵＰ內好多人都問發生左咩事。

但大部份既人都只係問拾拾……而且清一色係狗公……

人情冷暖真係可怕。

而事後我都有將七三廿一同拾拾既事話左比阿琪聽，阿琪聽到後都好替佢地開心，覺得佢地兩個經歷左咁多野先可以一齊真係好難得。

但唔知點解，呢一刻我望住阿琪，就覺得我同阿琪咁樣落去都會好似七三廿一同拾拾一樣，但係，唔知等唔等到，以及，唔知會唔會有一個美滿既結局。



當然，我無將佢地四個女仔討論佢既野講比阿琪知，因為阿琪剛剛出院，而且我覺得講左比阿琪知都無補於事，所以決定唔講。

ＪＵＤＹ同拾拾換左電話之後，Ｂ男就無再出現，睇黎先前Ｂ男可以洞悉拾拾既位置，真係因為果個ＡＰＰＳ，真係唔知係邊Ｄ人整個咁既ＡＰＰＳ出黎，實左太恐怖。

不過呢件事之後，所有野都好似有好多既轉變，除左七三廿一同拾拾既離去，ＪＵＤＹ同ＣＯＷ就變得更珍惜大家，阿珍同呂晨成為左好朋友，而佢地都開始唔多想理我同阿琪既事，定係應該話，佢地唔睇好所以唔理呢？

而我就依照返自己既想法做野，一直都同阿琪有互動，不過自從果個男人出現左之後就少左。

而變得最大既，應該係能蟹，成日同佢跑步，佢都好似未訓醒咁一路跑一路打呵欠，佢份工唔駛開ＯＴ架，但唔知點解整到成個人好累咁，有時我問佢搞咩，佢就只會話：「前晚玩到好夜。」



玩到好夜？但睇得出佢果種累唔係玩出黎架ＷＯ。

就呢件事，我有同阿琪講過，而阿琪決定要同我一齊跟蹤能蟹睇下佢發生咩事，但係見過鬼仲唔怕黑咩，仲比阿琪玩呢Ｄ野，我緊係話唔得啦，最多都係我自己一個人去。

就係因為我衰多口答應左阿琪，整到要今晚就行動……

咁其實能蟹平時去開邊我都知既，只不過……今晚行左好幾個佢會出現既地方都唔見佢，唔通佢轉左場？如果係既話就死火，香港咁多地方有酒吧，如果能蟹癲起上黎去左長洲果Ｄ吧既話，我未玩自己。

不過好彩我呢個諗法無成真，搵多左陣，我就見到能蟹鬼鬼祟祟咁跟緊一個人，一個我唔識既女人。



睇黎個死仔係睇中左呢條女……等等！？唔係ＷＯ！能蟹有女朋友架啦！佢點可以咁做架！

一於行過去嚇個死仔然後再鬧佢先。

一步、兩步、三步……我慢慢行近去能蟹背後，唔知一陣應該大力拍佢定係大叫好呢？

四步、五步、六步……能蟹真係好留意呢個女人，就算有幾個更靚既女人行過佢都無理。

七步、八步……「先生……」點解有人拍我背隻？我轉身望一望後面，「……先生，你阻住我啊。」背後拍我果個人原來係一個女人。

「……唔……唔好意思。」我讓開左條路比果個女人，比佢行先，點知個女人係我面前反左下白眼，真係好心著雷劈。

不過當果個女人想繼續向前行果陣，佢企直左個人講左一句：「屌！跟甩左添！」

原來呢個女人都係跟緊人既，而佢跟甩左人之後，用一個好怨恨既樣望住我話：「都係因為你呢條死毒撚。」



大姐，我同妳無仇無怨妳駛唔駛咁話我啊，而呢個女人鬧完之後就繼續去搵佢要搵既人。

真係無啦啦比人鬧，心情都唔多好，我望一望前面，仆街，我自己都跟甩左添，點算呢？能蟹去左邊呢？