[愛情無限loop] 就係咁，我做左女神一年既備胎: ２３８　七三廿一、拾拾，消失了

點解又會返到呢一個問題上面？點解又要係度話阿琪係女神定魔女？我只係想佢地知道，其實，阿琪都只係一個普通人，只不過……只不過……

當大家聽到拾拾呢一句說話後，都呆左一陣，而最先講野既果個人係阿珍，「佢擺到明係一個魔女，唔係一個女神，呂晨，妳話係未？」

被咁樣一問既呂晨只係好尷尬咁笑住回應：「其實我以前都係一樣，可能好多人都以為我係魔女……」

ＪＵＤＹ反左一下白眼話：「咁係妳果陣選擇要做姐，妳都知妳果陣係咁架咩。」呢一句有諷刺既氣味，呂晨聽到有少少不是味兒。

我見到佢地兩個咁就話：「咁呂晨而家未幾好，改左好多啦佢。」



「所以阿牛你以前都覺得我係魔女？」呂晨用嬲嬲地既表情望住我問。

唉……我點解會比自己陷修呢個局面咁撚蠢架，面對住嬲嬲地既呂晨，我本來講：「唔係，邊有……」「講明就無謂啦，妳自己知自己事。」ＪＵＤＹ！？妳幾時變左我發言人架？

呂晨聽到ＪＵＤＹ既說話後更加唔開心，而ＪＵＤＹ接住落黎就對住我講：「阿牛，其實一直我都無反對你追阿琪，而且一開始我係支持你，但係你諗上呢一直落黎，你同阿琪已經相處左一段時間但佢都好似不為所動咁，原因就真係好似佢咁講？真係關佢身體既事？真係因為果個男人？阿牛你年紀唔係話好大，但都唔細啦，你係未仲要花再多既時間落去？其實有無諗過你身邊有其他女仔出現而你有無去留意呢？」

面對住ＪＵＤＹ咁多既問題，我一時間都消化唔切，除左最後果個，亦姐係呂晨都同我講過既果個問題，我會唔會因為阿琪而錯過左其他女仔？

「……我……我唔知。」我自然咁答左佢。



而我呢個答案，換來既係ＪＵＤＹ既嘆氣，呂晨既無奈，以及阿珍既激動，「阿牛你究竟幾時先會醒架？」阿珍話。

好想置身事外既拾拾呢一刻只係不停望住我地，飲緊佢果杯已經凍左既熱奶茶。

我答阿珍既問題後大家都進入冷場既情況，而佢地逐個逐個離開，剩返我同拾拾。

「妳如果有事都可以走先。」我同坐係我對面既拾拾話。

而拾拾就微笑左一下講：「陪多你一陣啦。」聽到佢咁講我會心微笑左一下，然而，接落黎佢就話：「七三廿一話黎接我，我要係呢度等佢啊。」



原來如此……

等左一陣，七三廿一到左，佢坐係拾拾既旁邊問：「頭先傾成點啊？」

「未八掛啦你。」拾拾向七三廿一扮左個鬼臉話佢，而七三廿一就係度傻笑，佢地呢個動作，以及我睇到佢地兩個係臺底手拖住手，就問佢地：「你地一齊左拿？」

睇黎我呢個問題係明知故問，因為見到佢地兩個聽到我咁問後，互相對視甜笑左一下，呢個答案，唔駛講都知啦，一切盡在不言中。

去埋單前，拾拾因為要對廁所，得返我同七三廿一兩個人，「多謝你啊，阿牛。」

「多謝我Ｄ咩？」我問七三廿一。

「如果唔係同你傾過計，我諗我仲會繼續以成為一個壞男孩一直傻落去。」七三廿一咁講，我笑左一下回應，「你知就好，你根本裡裡外外都散發住一個好人既氣息，學咩野做壞人，只會令到自己辛苦。」

「嗯。」七三廿一點一點頭：「我仲要多謝能蟹佢，因為佢第一日教我做男神果陣，就糾正左我一個好錯既思想。」



「咩野思想？」我問。

「佢話男神之所以吸引到好多女仔，唔係因為佢壞，而係因為佢地有自信，佢教我既，就係要我做返個有自信既人。」我聽到七三廿一咁講，第一次覺我，我果個兄弟有時講野有真係幾有道理。

而我又問左七三廿一另一個問題：「我記得你講果一句，你想同拾拾一生一世既時候佢唔同你一齊，反而你唔想同佢一齊時佢就想同你一生一世，點解你可以放得開呢一個芥蒂？」

七三廿一笑左一笑，呢一笑有少少帶有諷刺，但帶有更多既係看破，「其實，緣份可以令到兩個人走埋一齊，亦都可以令到兩個人分開，係因為佢地之間仲有受夠考驗姐，緣份會考驗一個人既唔係佢點解一直無拖拍，係要考驗果個人如何知道自己雖然既另一半係點樣。」

可能，七三廿一同拾拾之間，真係少左呢一份考驗，但呢一份考驗，一試十年，「有情人終成眷屬，恭喜你地。」

「多謝。」七三廿一呢一句多謝後就話：「我同拾拾都決定左，會退出個跑ＧＲＯＵＰ，不竟其實我地係入面都唔多講野。」

「無所謂啊，最緊要係你地自己以後行果條路，係自己鍾意就得。」



拾拾返左黎後，我地就走去埋單離開，因為同佢地返去既路係相反方向，我地三個就係餐門口道別，我望住佢地走遠既背易，佢地兩個十指緊扣既手，七三廿一，拾拾，你地終於等到今日拿，我真係好替你地開心。

而轉身走左一段路後，我部電話響左兩下，我睇一睇電話既螢幕上面，有兩條黎自跑ＧＲＯＵＰ既ＭＳＧ。

七三廿一退出了
拾拾退出了