[愛情無限loop] 就係咁，我做左女神一年既備胎: ２４０　能蟹喊！？

死啦，都唔知能蟹條友仔會去左邊先得架，但係咁樣漫無目的搵落去都唔係辦法，所以慢慢有放棄既念到，但到我就想離開既時候，一把女聲蓋過晒咁多人既喧嘩。

「你理我做咩姐！！！！！」真係好大聲。

我用湊熱鬧既心態行左過去聲音既發源地，愈行近，就愈聽到有一個女人係度發晒癲咁嘈，而有個男人就好無奈企左係個女人面前，果個男人，係能蟹。

「你理我做咩姐！扮咩野好人啊！我以前幾咁關心你！你就當我隱形！而家我唔想理你！你就反過黎理返我！」個女人放任咁鬧，出晒力咁鬧，而我望一望個女人個樣，好似係邊度見過。

而比佢鬧既能蟹，我從來都無見過佢咁自責，佢一臉哀求話：「妳唔好咁啦，本身妳都唔係咁既……」「係啊！我本身唔係咁架！我好乖好純好好Ｊ添啊！但你唔撚鍾意乖女仔嘛！我未學壞囉！但原來我學壞之後先知道！原來你都唔係我想像中咁撚好！死仆街！」睇黎個女仔好似飲醉左酒。



我見到能蟹比人鬧成咁，都唔知好唔好行埋去，而能蟹上次左捉住左果個女人既手，「妳唔好咁啦，見到妳咁我個心都過意唔去。」

「你未理我啊！我鍾意點就點！」個女人話。

「我唔想妳受傷害啊，我知道妳已經比一個賤男ＴＡＲＧＥＴ左，我驚妳有事啊。」能蟹呢一句後，我終於諗返起當我地拎左Ｂ男電話睇佢電話入面內容果陣，睇到其中一個女仔既內容後，能蟹個表情係呆左，再睇真Ｄ，原來就係呢個女人。

「你放手啊！我鍾意點關你撚事咩！」個女人起勢想甩開能蟹隻手，而我見到咁，唔可以再唔去阻止，不過正當我想上前既時候，另個女人出現左。

「你個賤人瞞住我出黎溝女！」呢個女人我又認得架，係頭先話我阻住佢跟人果個人，呢個女人衝左上去後打左能蟹一巴，而呢一巴過後，能蟹鬆開左捉住另一個女人既手話：「唔係啊，你聽我解釋啦。」



而另一個女人就呢個時候走左。

「解釋！？證據確鑿啊！我親眼見到啊！平時又話出黎玩唔會溝女！叫我信你！你話而家我點信你啊！」個女人又打多左巴後就離開。

剩低既，就係少少睇熱鬧既人群，同埋坐左係地上面發呆既能蟹。

圍觀既人慢慢離開，而我就駐足係能蟹既面前，「仲望！你望撚夠……未……」能蟹抬頭見到係我，嗤笑左一下，「你睇到晒？」

我無答佢，只係扶起左佢，然後佢又話：「你又會一個人係度既？」



「最近見你成日好似唔多夠訓，又好似悶悶不樂有Ｄ野唔開心，阿琪聽到你咁都擔心你，叫我睇下你做咩啊。」我講左我既來意後，能蟹又嗤笑左下：「阿琪，你真係聽佢話。」

「未講呢Ｄ啦，頭先果兩個女人係邊個黎架？」我問。

而能蟹一臉既落莫答：「打我果個，係我而家既女朋友，佢叫能利，而走左果個，係一個我傷害個既女仔。」能蟹講講下低下頭無出聲，我見到佢係度喊。

「搞咩啊？」見到佢喊更係上前睇佢做咩啦，一上次先發現原來佢飲左好多酒，一身酒氣，「係我錯！係我令到一個好乖既女仔墜落左！」