[愛情無限loop] 就係咁，我做左女神一年既備胎: ２３７　適得其反變魔女

到左第二日，阿琪所講既野仍然不停係我腦入面出現，如果以我同果個男人係佢爸爸既印象黎講，我真係比唔上果個男人，同阿琪既感情……其實我都唔知阿琪對我既真正諗法係點，但係如果係因為呢個男人阿琪先一直唔敢接受我既愛既話，我點都要解佢呢個問題先得。

就係我諗緊呢個問題之際，電話響起，係呂晨打黎，點解佢會無啦啦打黎呢？

「喂？」我接起電話。

「阿牛你而家得唔得閒啊？」呂晨問。

「得閒啊，做咩事？」我問返佢。



「無啊，想你出一出黎姐。」呂晨話。

「出黎做咩？」我問。

「其實係ＪＵＤＹ佢地約出黎既，佢話好耐無見，而且佢知道左我幫手Ｂ男既事，想約出黎多謝我ＷＯ。」呂晨講。

我聽左佢講後，其實都唔係好關我事，所以話：「咁點解要叫埋我啊？」

「我都唔知啊，係ＪＵＤＹ叫我叫埋你ＷＯ。」呂晨既語氣硬係有Ｄ野瞞住我，我諗左一諗就答應左佢，因為係度估不如去睇下佢地搞咩都好。



去到佢所講既地點後，見到既係清一色四個女仔，阿珍、ＪＵＤＹ、呂晨同拾拾，我望住呢個組合笑左笑話：「搞咩啊你地呢班女仔。」

佢地見到我黎左後，先講野係ＪＵＤＹ：「你坐低先啦，有Ｄ野想開你。」

我聽佢講坐低左，然後阿珍就即刻問：「果日阿琪同你講既野，我係旁邊聽到晒。」我望一望阿珍然後話：「唔係掛，果日都隔幾開下架ＷＯ。」

「我出左名聽力好嘛。」阿珍好自豪咁話，然後就問我：「你唔會知阿琪果日講既野係真掛？」

比佢咁樣一問，我望一望我眼前呢四個女仔，而我又問一問阿珍：「妳講晒比佢地知？」



阿珍點一點頭，我就好無奈咁話：「妳有無搞錯啊，呢Ｄ係阿琪既秘密黎架，妳點可以四圍講架。」

「我唔理，我只覺得阿琪講既野唔可信，點會無啦啦有個未婚夫出黎，又點會好似佢講又可以唔係佢未婚夫，係佢阿爸鍾意先咁講，又點會係呢個時候比你知道呢件事，而佢又將個秘密話你知ＷＯ。」阿珍好似愈講愈惱。

而我就望緊其他三位既表情。

ＪＵＤＹ好似一個唔想相信，但係信出既樣，睇黎佢都係信阿珍講既野。

呂晨就係一副無奈既樣，我唔知佢點解會有呢個表情，但係我睇得出佢呢個無奈帶有對我既可惜。

拾拾，佢係一副唔想聽既樣，可能佢唔覺得阿琪係咁既女仔，又或者，佢其實咩都唔想知。

我見到佢地咁，只係無奈咁笑左一笑話：「點解你要咁呢？話晒阿琪同呂晨剛剛先出院，點解要拎呢件事出黎講，唔比佢地兩個好好休息下？」

「如果而家唔講既話，件事拖耐左就無得講架拿。」阿珍話：「我唔想我好朋友比一個咁既女仔傷害啊。」



「咩野咁既女仔啊？阿琪係點樣既女仔啊？」我都有少少嬲咁問阿珍。

「佢係一個攻於心計既女仔！如果唔係佢！果陣我同阿塔就唔會搞到大家唔理大家！」阿珍話，原來講到尾，阿珍都係介意果陣阿琪搞到佢同阿塔既事。

我無奈望住佢話：「果陣唔係阿琪一個錯晒，阿塔都有錯。」

「但係如果唔係佢，就唔會有呢Ｄ錯囉。」阿珍話：「總之呢個阿琪係邊，果個地方就會好亂啦。」

「妳講咩……」「阿珍都有佢既道理。」我都未講完，ＪＵＤＹ就話：「阿牛，你而家冷靜Ｄ回想返，果陣阿琪出現，本來圍住呂晨既狗公變成圍住阿琪轉，仲有暖男阿富呢，佢好大市場架，但係又係因為阿琪搞到而家都唔見左人，阿塔既事我都係聽阿珍頭先講先知，咁樣講起阿琪身邊既男女關係都好亂。」

我估唔到ＪＵＤＹ會咁講，但係更加估唔到既係，ＪＵＤＹ所講既一切，我都參與在內，其實認真Ｄ諗，ＪＵＤＹ所講既野唔算錯。

「不過，呢Ｄ都唔係阿琪自己想架，係果Ｄ男人……」「阿牛，你聽過牛唔飲水唔撳得牛頭低未，其實如果阿琪唔想，只要佢決絕Ｄ就唔會有咁多事情發生，係未？」



呢句係未不停咁衝入我既腦……係未？係未？係未？我好想否定，但係一個答我硬生生出現係我既腦入面。

係！

如果阿琪絕情Ｄ，可能就無左阿塔既事，無咁多狗公圍佢，阿富亦都唔會唔見左人。

「阿牛，我地怕係阿塔、班狗公以及阿富之後，下一個係你啊，我地都唔想好朋友比人傷害，而且係比我地另一個好朋友傷害。」阿珍終於無咁激動講左呢一返說話。

而好耐都無講野既拾拾講左以下呢一句：「如果有好多人鍾意既女仔叫做女神，咁阿琪呢個太過吸引人既女神，會唔會適得其反，變成魔女架？」