[愛情無限loop] 就係咁，我做左女神一年既備胎: ２３６　我……應該點……

面對住阿琪，我都唔知點答佢，如果阿琪去就會好耐都見唔到佢，但係，話晒都係阿琪既健康，所以，「妳更係要去啦，身體要緊啊。」

阿琪聽到我咁講後，微笑左一下話：「我屋企人都係咁諗，所以叫做佢黎。」

「佢？姐係果個男人？」我問。

「係。」阿琪呢一下點頭，我又少少反應唔到，「點解叫佢黎？」我問。

阿琪有少少臉帶難色話：「我爸爸叫佢黎幫手，因為上去醫花費都唔少，所以……」



「妳爸爸叫佢黎係幫妳比錢？」我問，不過呢個問題可能係多餘，因為我見到阿琪既表情，就知道我係估岩左。

阿琪嘆一嘆氣話：「我唔想再接受佢既恩惠，因為佢幫我實在太多，而一時三刻我又還唔到比佢，而且最重要既係，佢都唔想我還比佢。」

阿琪呢一句話姐係表示，呢個男人想阿琪欠佢一輩子咁樣，不過我都覺得呢個男人係想咁做。

「咁……」呢個處境我真係唔知點講後，阿琪唔想受佢既恩惠，但係一方面就不停無條件付出，雖然口講無所謂但實則慢慢累積緊壓力比阿琪，而最重要既係，阿琪爸爸……

「咁個男人會幾時帶妳上去？」我問阿琪，而佢反而用好奇既目光望住我問：「你都想我去？」



想？我更係唔想啦，見唔到阿琪一兩年ＷＯ，如果話一對情侶異地戀都會擔心分手，我同阿琪都未開始就要面對呢Ｄ事，最仲要我都唔知到最後可唔可以同阿琪一齊ＷＯ，如果可以既話我就更係唔想阿琪返上去啦。

不過，話晒都係阿琪既健康……「話晒都係妳既健康，點可以唔去啊，我唔想妳成日有病有痛啊。」

究竟我係偉大定係蠢呢？究竟我係未應該自私Ｄ留住阿琪呢？究竟我係未應該咁做呢？

但係，我又唔係阿琪既邊個，點可以諗咁多。

阿琪聽到我咁問，只係答我：「我無答應佢，所以無諗過。」



所有話題，都好似係呢一句後完住靜止左，而走開左既果四個人都坐返黎講返Ｂ男既事，佢地係到討論緊要幫拾拾換電話，仲要話埋比ＣＯＷ同ＪＵＤＹ知，但係，我同阿琪已經無咩心情同佢地討論呢個問題，我地兩個只係好靜咁坐係度，不時點頭回應下佢地，因為，我地兩個腦入面諗緊既，係另一件事。