[愛情無限loop] 就係咁，我做左女神一年既備胎: ２３２　枕頭上既眼淚

拎鎖匙……開門……踏入屋企第一步……

轉身……關上門……然後慢慢咁行入房……

腦入面空白一片既我，好公式化地做出以上既動作，行到床邊，成個人無力咁訓落床上面，望住天花，腦入面只得返三個字……

未婚夫……未婚夫……未婚夫……

呢三個字好似連同與阿琪既回憶不停係天花上面播放緊。



我同阿琪既相識、同佢第一次跑步、阿琪同我傾心事傾到喊……

同佢好開心去吉野打邊爐、一整練跑以及第一次跑１０Ｋ馬拉松、一齊衝線既果一刻……

陪佢一齊去飲野、同佢去超級市場買野食、同佢慶祝生日時同佢一齊者野食以陪寫有「師奶仔」既蛋糕……

買泳衣送比阿琪果陣、游水果陣做佢臨時既對岸果陣、以及面對住佢好近距離果陣……

甚至係佢咬完一啖既湯丸要我食、同佢食同一支雪糕、互相夾菜比大家食……



點解？點解睇睇下呢Ｄ回憶果陣影像會開始散開既？原來係因為眼淚，眼淚不自覺係我眼角流出黎，滴到我既枕頭上面，個心好痛，係撕裂既痛，回憶之所以比稱作回憶，係因為某件事結束左無法延續落去，就好比情侶分手佢地既甜蜜化成回憶，就好比家人去世幸福既時光變成回憶一樣。

而我同阿琪，當我聽到果個男人講果三個字之後，我諗……我諗真係要結束。

我唔係懦弱到唔去捍衛自己想要既愛情，而係我明白到，一場愛情要有簡單既開始先可以有美滿既結局，如果果個男人真心愛阿琪，而阿琪都對果個男人有意思，我諗，我應該退出。

可能，呢個男人可以比到阿琪係我身上面搵唔到既愛情衝動。

講到好偉大咁，但係唔知點解有一種憎恨自己既心情衝左出黎，我憎恨自己既偉大，點解要係我……



好想喊，但我無喊出聲，喊到累後自然咁就訓左。

直到第二日，「死仔！訓覺流口水流到成個枕頭都係！」老牛大人既叫罵下，我醒左，我感受到係我臉上面有一種水既冰冷，我會意到，果Ｄ唔係老牛大人口中所講既口水，而係我既眼淚。

我坐直左個人後，望一望前方，「嘩！搞咩對眼咁紅啊？尋晚一定又去左玩到好夜啦。」

無咩心情答佢既我走左落床，行到洗手間既鏡前面，我望住鏡入面既自己，心中有一個問題，我係邊個？點解我會變成咁既？

然後，手機響起，係能蟹既ＭＳＧ，佢問我今日會唔會去醫院接阿琪同呂晨，我只係簡單咁覆左兩個字。

我：唔會
能蟹：我明既，兄弟心照唔駛講咁多

點解？點解阿琪原來有未婚夫但佢一直都唔話我知。