[愛情無限loop] 就係咁，我做左女神一年既備胎: ２２６　成功讀取

我地而家將所有目光都放晒係個冰桶上面，而呂晨當然就同Ｂ男好專心咁掟鏢啦。

講開又講，原來呂晨掟鏢都好勁，原全無讓Ｂ男既意思，而Ｂ男見到呂晨既身手就話：「估唔到妳都幾勁下ｗｏ。」

呂晨聽到後就好嫵媚咁笑左笑話：「所以你唔好以為可以咁輕易就得到我啊。」

佢呢一句咁有挑釁性既說話，無令到Ｂ男嬲不特止仲令到佢更有征服呂晨既決心，「黎未黎囉，我頭先讓妳咋。」Ｂ男一臉認真咁開始掟鏢，亦姐係代表佢已經將所有既注意力放係掟鏢機果度，無時間理個冰桶。

呢個就係一個最合適既時機，我地幾個睇一睇其他人，佢地都好專心咁睇住呂晨同Ｂ男既比賽，無理到個冰桶，睇黎係時候行動拿。



我同最近冰桶既能蟹打左個眼色，而能蟹都好醒收到我想講咩，慢慢接近個冰桶，用好快手既速度就拎走左個冰桶。

事情未免進展得太順利拿，佢一拎到個冰桶就走左去吧臺果邊，而我地幾個都係，阿琪一去到吧臺就叫左個酒保拎我地一早放左係度既電腦出黎，而我打開電腦，一接上部電話後，運行左我朋友比我既程式。

「估唔到咁簡單。」七三廿一望住電腦上所顯示既讀數話，無錯，我都估唔到可以咁簡單。

但唔知係未就係因為咁諗，上天點都要比Ｄ野我地嘆，就係呢個時候，Ｂ男既電話響起，上面只係一個編左編號既電話來電以及一個女仔既相，我地幾個見到電話響起都嚇左一跳，而且能蟹係最驚果個，因為佢嚇到成個人呆左。

電話一直響，但係個程式都未行完，點算好呢？電話既響聲好似已經傳到去佢地果邊，我向呂晨打左個眼色，佢見我地好似有Ｄ唔對路，亦都見到Ｂ男好似聽到自己既電話響……



唯有要佢拖一拖Ｂ男。

「嘩～你又勁ｗｏ～咁大差距都比你追返上黎～」呂晨望動獻身成個人挨左過去Ｂ男度，而Ｂ男見到女神咁，就攬住左佢條腰話：「妳仲勁啦，我仲未見過一個掟鏢咁勁既女人。」

「你讚到人地好開心啊～」呂晨講完後望一望我，示意叫我熄左Ｂ男既電話，咁我就叫而家拎住電話既能蟹熄，但唔知點解佢呆左一兩秒後先好似聽到我所講既野咁熄左部電話。
日暝

真係辛苦呂晨咁樣做……「你好衰架～到我掟拿，你快ｄ放開人地先啦～」呂晨講完後，Ｂ男回應：「又好，都唔急在一時。」

程式行完顯示出成功讀取既畫面，我地即刻放返Ｂ男既電話入個冰桶後放返原位。



返到電腦前面果陣，我地迫不及待睇Ｂ男既電話入面，唔知有無我地想像中要搵既野。