[愛情無限loop] 就係咁，我做左女神一年既備胎: ２２５　奪機

交代返少少野先，你地可能會問點解我地同呂晨以及Ｂ男有一段距離，但係點解都知道佢地講Ｄ咩野？係因為呂晨一早就ＳＥＴ左個收音係佢對耳環度，所以佢聽到Ｄ咩，我地都聽到Ｄ咩。

以及因為呢度既酒保同阿琪好熟……熟到我覺得果個酒保係想追阿琪添啊！！！不過呢一樣野而家都唔係最重要住，就係因為阿琪同呢個酒保既交情，所以佢都好配合我地。

點解要佢配合？係ＷＯ，其實到而家我都無講過我地既計劃。

我地最後覺得，點都要拎Ｂ男部手機黎睇下佢裝左Ｄ咩前係入面，以及仲有幾多個受害者，所以我問左我一個好熟ＩＴ既朋友，佢比左個ＰＲＯＧＲＡＭ我，話只要運行呢個ＰＲＯＧＲＡＭ，當Ｂ男部機接上左部電腦，就可以睇到佢部機入面既野。

所以我地準備左部電腦放左係吧臺果邊，當然係一個好隱密既地方啦，而呂晨就只要諗到方法幫我地拎到Ｂ男既手機，駁上電腦然後運行完呢個ＰＲＯＧＲＡＭ就ＯＫ。



計劃好似好簡單，但係唔知一陣實行果陣會點呢？

而我地都講左，只要呂晨講果兩個字，我地既計劃就正式行動，而果兩個字就係「剌激」。

「剌激？妳想要邊方面既剌激啊？」Ｂ男隻手慢慢游走到呂晨既肚，我見到即刻眼火爆，當然另一邊既能蟹同七三廿一都一樣。

不過今次呂晨決定自保，佢拎開左Ｂ男既手，然後哄埋佢耳邊話：「就咁比你得到手都唔好玩既，你見唔見到果邊有得掟鏢啊？」

Ｂ男聽到呂晨咁問後，就望一望去掟鏢機果邊，然後答呂晨：「見到啊，咁妳想點？」



「掟一場，睇下你眼界準唔準先。」呂晨嬌嗲起上黎，真係所有雄性既動物都抵擋唔到。

然後Ｂ男同呂晨都行去掟鏢機果邊，講真，現場所有人既目光都放係佢地兩個身上，可能因為覺得，點解呂晨咁正，都要同一個大叔一齊玩，不過我諗無人諗得明，背後係有一班人實行緊計劃。

而當佢地兩個行到過去果陣，Ｂ男就問：「咁贏左點先？」

而呂晨就笑左笑話：「你估你一定贏架。」呂晨呢一笑充滿自信，然後繼續講：「不過掟之前，先放左部手機係呢個桶度先，費時一陣掟果陣手機響，影響到。」呂晨隨便咁拎左附近一個空既冰桶，然後將自己既手機放左入去，Ｂ男見到呂晨既動作後，就話：「好啊。」

我地望住Ｂ男放部機入個冰桶，當聽到佢部電話同個冰桶碰撞既聲音，我地明白，計劃既第一步成功。



呂晨將個冰桶放左係個臺上面，而下一步，就係要睇下點樣將部手機移到去我地既手上。