[愛情無限loop] 就係咁，我做左女神一年既備胎: ２１９　時間

返到家……

「你個死仔捨得返黎拿。」老牛大人成個攝青鬼咁係我後面出現，嚇到我叫左出黎：「喂，阿爸……人嚇人無藥醫架。」

「未咁大聲吵醒你阿娘啊！」又係一下打左落我既頭度，然後佢就行去露臺好靜咁坐左係度，睇住佢呢排先開始養既魚。

「做咩咁夜仲唔訓，係度睇魚啊？」我問老牛大人。

老牛大人繼續望住Ｄ魚話：「無啊，諗緊有個ｏｎ９仔仲未諗到佢阿爹想點過生日姐。」



係ｗｏ！？掛住忙拾拾同七三廿一既事，都唔記得左老牛大人佢就快生日既事，「咁阿爸你想我地點同你慶祝？」

老牛大人嘆左口氣話：「要講出口就無意思啦，上次先叫你自己諗下，你有無諗過架？」

呢一刻，係我腦海入面不停諗緊老牛大人同得講過既野，但係都無一樣野係關於老牛大人想點過生日既事。

「……有無提示啊？」我問。

但係老牛大人無答得，只係起身行返房，一路行一路講：「仔大左都只會記得自己條女鍾意咩，我明既。」佢回頭望一望我話：「我記得我後生果陣都好似你咁。」



「咁阿爺果陣點對你啊？」我問，而老牛大人就答：「佢咩都無做，然後，年年我都唔記得同佢過生日，次次都係補祝，直到你阿爺走左都係咁。」

我聽到老牛大人咁講，就答佢：「放心啦，我一定唔會好似你咁既。」我語帶輕鬆咁回答，但係老牛大人卻係心事重重咁話：「希望啦，我而家終於明白果陣自己老豆諗緊Ｄ咩。」

然後，老牛大人就行返入房。

看似開玩笑既對話，但係睇得出老牛大人係好認真，可能人到左某個年紀就會咁掛，我望住果Ｄ魚，無再諗呂晨同我講既野，反而係度諗，我真係好似好耐都無陪屋企人。

我係未應該花Ｄ時間去陪下佢地呢？



但係其實我Ｄ時間，又花左去邊度令到我唔可以陪佢地呢？