[愛情無限loop] 就係咁，我做左女神一年既備胎: ２１８　認許

面對呂晨呢個問題，我只係傻笑咁答：「妳未玩我啦，我呢種咁既人，邊會有人留意我。」

呂晨聽到我呢個答案後，只係微笑左一下，行係我前面踱步既佢同我講：「如果你係咁諗既話，點解你咁有自信地等阿琪啊？」

啊……呂晨咁講又岩ｗｏ，我頭先個答案好似好矛盾咁……

我陷入左一個混亂既局面，而呂晨就係呢個時候打左我一下話：「我講下你未咁上心啦，以後既野無人會知，就好似我以前咁，我都無諗過如果我唔做女神既話，仲開心過做女神。」

聽呂晨咁講，佢好似好鍾意而家既生活。



「只要好好地活在當下，以後條路就會好好走，除非有突發事情姐。」呂晨話：「不過當有突發事情果陣，就要睇下有邊個人係你身邊拿。」

突發事情……身邊？

呂晨突然一個箭步行到我面前，就快面貼面咁望住我，我被佢呢一下既舉動嚇左一跳，向後左半步後問佢：「妳想點？」

呂晨微笑左一下，但係佢呢一下微笑下既眼角多左眼淚，「我講過唔會再煩你同阿琪，放心啦。」

佢一個轉身後，又用背脊對住我，唔知係未我眼花，呢一個轉身，好似連帶佢眼角既眼淚都比佢整飛出黎，劃下左一道完美既閃亮孤線。



「你要多Ｄ留意下身邊既人啊，我唔想你等阿琪一年、兩年、五年，直到等唔到阿琪先知道你錯過左好多更值得你為佢而佢又鍾意你既女仔。」呂晨呢一句說話，我諗左成晚都唔係好明，我自問身邊無咁多女仔朋友，就算有，好多都已經名花有主，有點會有其他女仔鍾意我呢？

送到呂晨返到樓下，「好拿，我到拿，你快Ｄ同阿琪報到先啦。」

呂晨呢一句話，我只係傻笑回應。

就當我轉身準備走果陣，「阿牛。」係呂晨叫住左我，我回頭望一望問佢：「咩事？」

「你咁耐無見返我，今晚見返對我第一個印象係點啊？」呂晨又係好期待我既答案。



而我，就笑左笑話：「我覺得，而家既妳唔做女神真係浪費到一個點。」

呂晨聽到我既答案後，笑到痴晒線話：「你真係好傻。」

「快Ｄ上去訓啦，好夜拿。」我話。

「知道拿，阿牛。」呂晨答我。

係回家既路上，我不停諗緊呂晨頭先問我既問題，其實我一直都無諗過為左阿琪，我會錯過左Ｄ咩野女仔，甚至係，當我預到阿琪，我好似對任何女仔都只有朋友既感覺。

呢一種感覺，就好似我同前度拍拖既時候既情況一樣。

可能，呢一種叫做認許掛，我認許左阿琪係我而家最愛既女人，就好似七三廿一咁，佢等左拾拾十年，一定都有呢一種認許既感覺，佢認許左拾拾係佢最愛既人，為左佢可以不惜一切做任何事，甚至知道拾拾肚入面個ＢＢ唔係佢，佢都可以為左拾拾做呢個ＢＢ既爸爸。

但係，如果當我遇到令一個我認許既女人，到時又會點呢？定係，當有一天阿琪都好似拾拾咁決絕左一次後，我會唔會變左另一個七三廿一？