[愛情無限loop] 就係咁，我做左女神一年既備胎: ２１５　想點？

呢次飯局結束，雖然得唔到想要既答案，但係知道左更多關於拾拾同七三廿一之間既事。

「妳唔好話比拾拾知我地搵過妳。」我同壹百講，然後佢就笑笑口話：「放心啦，我識做既。」

然後阿琪就問壹百：「係呢，妳跑唔跑步架？」佢突然咁問，我地三個都呆一呆。

「又會無啦啦轉話題轉得咁快既。」壹百笑住講，然後展示左一下自己既身材話：「我身材咁好，妳就知道我有做開運動啦。」

「咁姐係妳有跑步？」阿琪又問。



「點解係都要問我有無跑步呢？」壹百笑住話：「妳真係可愛，哥仔，你女朋友幾得意，好野黎架你好好珍惜。」

佢突然咁講，我同阿琪就問佢：「妳同緊邊個講野？」

壹百就露出奇怪既表情話：「你地兩個唔係情侶咩？你地兩個散發出一股好濃烈既情侶味ＷＯ。」

佢咁樣講後，阿琪臉紅晒，而我就話：「唔……唔係啊。」

壹百見到我地咁，就賊笑左一下話：「而家唔係姐，但你想以後係ＷＯ。」然後佢笑得好大聲。



「其實我想同妳做朋友先問黎有無跑步咋，但估唔到妳咁樣笑人……」阿琪呢一句後，壹百笑得仲大聲，「我已經當左你地兩個係朋友啦，你地以後結婚果陣記得叫埋我。」

「喂！」阿琪不好氣咁話。

就係呢一個愉快既氣氛下，我地同壹百道別，剩低我地三個後，七三廿一開口話：「最後我地都係唔知道點解Ｂ男點解會成日知道拾拾既去向。」

「係……」我答佢：「唔知仲有咩方法可以知道……」我一路講，就望行我旁邊既阿琪，佢若有所思咁既款，「妳唔好諗埋晒Ｄ危險野。」我話佢。

而佢聽到我咁講後就話：「你係未諗緊我而家諗緊既野？」



「都話唔比啊！好危險！」我話。

「我都知，但係諗唔到另一Ｄ方法。」阿琪話，然後佢好認真咁講：「雖然我同拾拾岩岩識，但當我聽到佢既故事後，我覺得有一部份都好似我。」

「下！？阿琪妳以前做過援交架！？」問呢個問題既係七三廿一，我同阿琪向七三廿一反左下白眼，而阿琪答：「無啊，我係指屋企果方面，我都要成日睇住頭家同埋幫屋企還債，所以我好明白拾拾以前係幾辛苦。」

「我知道妳係為左拾拾著想所以想幫手，但係Ｂ男呢正式賤男，我係唔會比妳去冒險……」我一直話，阿琪就用哀求既眼神望住我，佢次次都係咁樣，但係今次係有關阿琪既安危，我點都唔會答應。

「如果……」七三廿一呢個時候話：「如果叫埋佢地幫手，你估得唔得？」

「佢地？」我同阿琪聽到七三廿一既問題後問。