[愛情無限loop] 就係咁，我做左女神一年既備胎: ２１４　錯過了的一生一世

「姐係妳都唔知拾拾點解會同Ｂ男一齊？」我問，呢個就係我地今日約佢出黎最望要既目的。

「我唔知佢地點解會係埋一齊，但係我可以講Ｂ男根本無真心愛過拾拾，但係拾拾一直盲目咁話Ｂ男係愛佢，有時我都唔明佢諗咩。」壹百話，然後就望住七三廿一講：「但係而家拾拾已經無再同Ｂ男一齊，所以你會唔會同拾拾一齊？」

被壹百咁樣一問既七三廿一，無出聲，睇黎佢唔想回應呢個問題。

而我就問壹百，「咁點解妳會話Ｂ男唔係真心愛拾拾？」

「有眼睇囉，你話一個男朋友會唔會成日打自己個女朋友？又成日呼喝佢？仲有佢成日出黎玩、流連酒吧晚晚唔同女，但係佢又唔比拾拾出黎玩ＷＯ，最恐怖既係唔知點解佢好似知道拾拾廿四小時既位置咁，總係可以無啦啦出現係佢身邊然後帶走拾拾，就好似上次係長州咁，佢都係無啦啦出現話要帶拾拾走，只係果次拾拾唔肯咋。」壹百講到面都紅晒咁，睇黎佢都覺得Ｂ男咁做好可恥。



而係佢言語間，我地聽到一件好重要既事，就係Ｂ男可以隨時出現係拾拾既身邊，究竟佢係點樣做到咁架呢？

就係呢個時候，阿琪就問：「妳話果個人成日去玩，佢會去開邊度玩？」

壹百聽到阿琪咁問後，諗左諗話：「尖沙咀係佢地擔。」然後阿琪就好似係度盤算緊一Ｄ野。

而唔知點解，我見到咁樣阿琪，心中有一種不祥既預感，「妳想做Ｄ咩野？」

「我想睇下點樣埋佢身，查下點解佢可以知道拾拾廿四小時既位置。」阿琪講得一副理所當然。



「傻左啊妳！咁危險！」我第一次咁大聲喝阿琪，而阿琪見到我咁都嚇左一嚇。

「你地今日約我出黎，就係想知呢Ｄ野？」壹百問，而我就點一點頭。

「睇黎呢個傻女最近都識返Ｄ好人。」壹百微笑咁話，然後語重心長同七三廿一講：「我唔知你而家仲對拾拾有無意思，但我相信佢係你心目中有一定既地位，就算你真係由愛轉恨，都唔能夠磨滅到你以前對拾拾愛既感覺，我知道你因為拾拾咁樣對你而去學壞既事。」

「妳……點知……」七三廿一話。

「有眼見，但係就算你點學都好，你點都係一個好人，就算你點想做一位男神都好，你點都係一個宅男。」壹百既直言，令到我同阿琪失笑左一下。



「但係，就係因為你既好，先可以將拾拾拉返出黎，我而家問你多次，你想唔想同拾拾一齊？」壹百好認真咁問。

頭先無答既七三廿一，係呢一刻只係講左一句話：「我想愛佢一生一世既時候果陣佢無選擇我，點解要到我離開左既果陣佢先倒返轉頭想同我一生一世。」

呢一句，就好似我成日講果句，愛果陣唔珍惜，到無左先話要珍惜，呢Ｄ，係愛咩？