[愛情無限loop] 就係咁，我做左女神一年既備胎: ２１６　女神呂晨

七三廿一口中所講既佢地，就係指能蟹同阿珍，而呢件事因為都關關地ＪＵＤＹ同ＣＯＷ事，所以就無搵佢地。

但係估唔到既係，阿琪搵左佢幫手……

「你地覺得咁樣可唔可行？」我到而家呢一刻都唔相信，我眼前坐住果位呂晨，竟然可以同阿琪咁好朋友。

係，阿琪帶左呂晨黎，佢話如果我擔心佢去搵Ｂ男既話，點都要搵返個有咁上下靚既女仔引Ｂ男中計，然後佢腦入面第一時間諗到既就係呂晨。

呢度有一個小插曲，就係當阿珍聽到阿琪咁講後，佢就話點解阿琪諗唔起佢，姐係話佢唔夠靚啦。



呢一點我就真係唔想認真係講。

能蟹同七三廿一都係第一次見呂晨，佢呢兩條友一見到呂晨後就扮晒野咁，好似想吸引呂晨既目光，但係呂晨由坐低到而家，都無理過佢地兩個。

「係就係幾好，但係妳自己都要小心自己啊。」阿琪一再叮嚀呂晨，而呂晨就話：「唔駛驚既，到時有阿牛衝出黎保護我嘛。」佢對我好嫵媚咁笑左一笑。

見到佢咁我就只好傻笑話：「我諗唔止我衝出黎既，佢地兩個都會架。」

「更係啦！」係我眼前既，唔係能蟹同七三廿一，而係兩隻狗公。



呂晨笑左笑後又問：「我聽阿琪講因為你會擔心佢唔比佢咁做，所以佢先搵我黎幫手，咁如果係我做，你會唔會擔心我啊？」

我聽到呂晨咁講後，望一望阿琪，只見到阿琪好尷尬咁笑左笑後打左呂晨一下，而我就唔知講咩好，直到呂晨話：「好失望啊，我諗如果係阿琪，你一定即刻答話：『當然擔心啦。』，枉我以前鍾意過你，阿牛你真係無本心。」

佢呢句說話，令到兩個敵視既目光望住我，就係狗公狀態既能蟹同七三廿一，我面對住佢兩個，仲有呂晨既說話，只好求饒咁話：「你未玩我啦呂晨。」

呂晨笑得好開心咁話：「咁耐無見你，玩下都唔得啊。」

但係，我都唔知今次阿琪就得岩唔岩，因為要令到Ｂ男中計，叫呂晨黎幫手，我只怕佢到時真係會有危險。