[愛情無限loop] 就係咁，我做左女神一年既備胎: ２１３　那件事

「就係因為咁，拾拾就唔考慮接受我？」七三廿一問壹百，而壹百都好直接回應佢：「係。」

呢一個係字，令到七三廿一無力咁坐左係度，而壹百就繼續：「七三廿一對拾拾愈好，拾拾就愈有罪惡感，七三廿一愈愛佢，拾拾就壓力愈大，慢慢地，拾拾決定唔理七三廿一，開始同其他男仔拍拖，但係果Ｄ男人只係貪圖拾拾既美色，完住無感情基楚可言，有Ｄ甚至係拾拾既客，所以感情快黎快去，不過呢條友仔既堅持都好勁，佢一直係拾拾身邊守候住，就好似永遠都覺得自己拎住一個輪候號碼第一人咁，唔理拾拾對佢點，佢都不離不棄，直到果次……」

「唔好再講拿……」七三廿一阻止左壹百既說話：「果Ｄ野我唔想咁多人知道。」

而我望住佢地兩個，都估都Ｄ，所以問佢地：「係未拾拾對落仔既事？」

「拾拾連呢樣野都話左你知？」壹百用一個好出奇既眼神望住我，然後繼續講：「無錯，就係果次，拾拾唯一一次，亦都係七三廿一最後一次陪拾拾。」



陪住自己最深愛既人去落仔，而且個仔唔係自己呢一種感覺，唔知係點呢？係難受，係不忍，係自責，係無奈，因為我而家呢一刻見到七三廿一既表情，雖然件事已經過左咁耐，都仍然見到呢四個感覺充斥係佢既表情入面。

「果日坐係診所入面，聽住姑娘逐個人叫名，雖然唔係數字，但就好似倒數緊一樣，我眼白白睇住拾拾將一條生命送走，但我又無能為力。」七三廿一話：「當姑娘叫拾拾個名既時候，我陪佢行到姑娘既面前，對好晒資料後，就帶左拾拾入去，而係佢入去之前，我叫停左佢，然後走到拾拾身邊同佢講：『生佢落黎，我做佢爸爸。』。」

我同阿琪聽到呢度，都驚嘆七三廿一既偉大及勇氣，但係……

「不過果陣既拾拾只係笑左一笑，然後答我：『你又唔係我邊個，唔需要你去負責。』，然後佢就同姑娘入左去，係果一刻，我只覺得自己好傻，點解我講到咁樣，拾拾都唔肯接受我對佢既愛，點解佢要咁樣做，係短短半小時入面，佢又有ＢＢ變返無ＢＢ，而佢出黎果一剎那，我睇得出佢係好唔開心，但係亦都由果一剎那，我再諗唔到可以同拾拾講Ｄ咩野說話。」

一個人對另一個人下左如此既承諾，但被另一個人簡單既否缺，我明白點解七三廿一果一剎之後再唔知對拾拾講Ｄ咩野，因為佢已經傾盡自己既全力，但係都得唔到別人既肯首。



「呢條友就係果一次之後，慢慢減少搵拾拾，直到佢再同拾拾表白多幾次又被拒絕，而拾拾之後同左Ｂ男後，佢都心灰意冷走左，其實果陣我都唔明點解拾拾要同Ｂ男一齊，直到而家都唔明白。」

「可能，佢想作賤自己掛。」我衝口而出答左，而阿琪就打左我一下，埋怨我咁講。

不過壹百就話：「可能啦，又或者佢已經對愛情無左憧憬。」