[愛情無限loop] 就係咁，我做左女神一年既備胎: ２１２　何必如此地玩弄

「等等，妳頭先講七三廿一讀大學先識拾拾，而七三廿一話已經等左拾拾十年，咁佢地兩個而家年紀應該好大下先係架ＷＯ……」提出疑問既我望一望七三廿一。

而七三廿一見到我望佢既眼神，就話：「我等拾拾係十年，無話我同佢相識左十年。」

「下？」我同阿琪疑問。

壹百見到我同阿琪咁就解話比我地兩個聽：「呢條友仔，原來佢同我地讀同一間中學，無咩存在感所以連我都唔知中學時期有一個咁既人出現，原來呢條友仔係中學果陣就好鍾意拾拾，一直留意佢既一舉一動但又唔敢去識拾拾，直到上左大學係一次機緣巧合下先識到。」

聽到壹百咁講後，我更加用一個佩服既眼神望住七三廿一，如個等一個人係技能既話，我諗佢呢方面一定好高分。



「果陣拾拾好怕識人，讀左好耐都只係得我呢一個朋友，而讀大學果陣有一個老師話佢咁樣唔得，所以就叫左佢好幫果位老師手，而果陣七三廿一都有比果個老師叫去幫手，佢地就係呢個時候認識。」估唔到幫佢地兩個人結識既，係一位老師。

「雖然拾拾都肯同七三廿一做朋友，不過援交呢件事佢無同七三廿一講過，話晒呢Ｄ野都唔係一種見得光既事，而且七三廿一係男仔，更加唔會話比佢知，但係佢同七三廿一相處得愈耐，佢就覺得七三廿一份人好好，係好到無人可取代既地步。」壹百講完呢句後，我好奇怪，奇怪既係七三廿一既表情，佢竟然係一臉既驚訝。

「但係拾拾一直都為自己係個援交妹所以唔敢識男朋友，佢亦都知道七三廿一其實鍾意佢，但佢覺得自己唔係一個好女仔，襯唔係任何好既男仔，就算自己對七三廿一有好感，都只好將呢件事放入自己既心底。」壹百講到呢度後，七三廿一就問：「拾拾對我有好感。」

七三廿一呢個問題，亦都係我同阿琪呢一刻想問既野，雖然，我地都知道拾拾對七三廿一有好感，但估唔到既係，原來由一開始果陣已經係。

壹百佢點一點頭話：「係啊，只不過你呢條ｏｎ仔唔知姐。」



七三廿一聽到壹百既說話後，有Ｄ喜悅，但下一刻就被自責所侵佔。

而壹百就繼續講：「不過果陣呢條ＯＮ仔都唔蠢得晒，佢成日話拾拾有Ｄ野瞞住佢，所以有幾次佢好大擔咁跟蹤拾拾，見到佢同唔同既男人一齊去酒店，果左幾個鐘後拾拾又會同個男人前後腳走，有次仲大擔到走上次問果個男人野，而果個男人直接話左拾拾做援交比佢知，仲比左拾拾做援交既聯絡方法佢七三廿一。」

「果陣時，我都諗緊好唔好搵拾拾。」七三廿一接全壹百既說話講落去：「我拎住果個男人既比我既聯絡，係度爭扎，直到我去左７仔買左個貯值卡，用呢個新既號碼聯絡拾拾，我到而家仲好記得果陣時既對話……」

ＸＸ：ＨＩ
拾拾：你好啊
拾拾：七三廿一先生
ＸＸ：咩野七三廿一先生？


拾拾：你呢個號碼既最後四個字係七三廿一，我通常都係咁稱呼我既客人
ＸＸ：原來如此
ＸＸ：咁我就係七三廿一啦

「我就係果陣時，叫做七三廿一。」七三廿一佢微笑中帶點哀愁話：「我同佢約好左時間地點，我亦都一早就ＢＯＯＫ左酒店，叫佢果日自己一個人上去先，因為未去到最後，我都心存一個希望，係我睇錯左姐，可能我一直跟蹤果個人只係一個好似拾拾既人，甚至覺得果個男人比既聯絡一定唔會係拾拾，但係直到我上到去按鐘，拾拾連防盜孔都唔望下就開左門，我地一對望果一刻，我呆左，雖然有心理準備但係都係呆左，而拾拾，就係我面前好崩潰咁喊。」

七三廿一講講下，眼角有少少濕，可想而知直到而家，佢對果日既震憾仍然好深刻，「自己鍾意既人係面前喊到崩潰，我上前抱住佢，第一句就講：『唔駛講其他野，我知妳一定有苦衷。』，而拾拾真係無講過一句說話，佢只係不停咁喊。」

「咁你知唔知佢果日喊咩野？」壹百話：「佢喊既，係覺得自己最差既一面比你知道左。」

「但我對佢係唔會變。」七三廿一話。

「拾拾知道，但係佢更加知道，自己接受唔到呢一份愛。」壹百話。

而我同阿琪在旁聽到呢Ｄ事後，只有一個諗法，就同先前一樣，緣份真係鍾意玩弄人，但點解要咁樣玩弄拾拾同七三廿一。