[愛情無限loop] 就係咁，我做左女神一年既備胎: ２１１　不幸既開始

壹百一坐低，第一句就話：「呢條友仔幾面善ｗｏ，好似係邊度見過咁。」

上次見過佢都覺得佢係咁既性格，所以我都唔覺怪，只係阿琪有少少覺得佢第一次見面就咁樣講野，印像麻麻。

「我記得拿，你就係上次去長州果陣同拾拾傾緊果個死宅男。」呢位壹百小姐，宅男前面可唔可以唔好加個死呢？

而阿琪聽到佢咁講後，就問我：「長州？」

「上次我自己一個人去果次，我就係果次識到拾拾……」我講講下就慢慢停左，因為感覺到阿琪用一個抱怨既目光望住我。



佢咁樣一望，我即時咩都唔敢講。

而壹百佢同我寒喧左幾下後，就同七三廿一講野：「你個死仔，好日唔搵我，今次搵我咩野事啊？」

「無，呢排我撞返拾拾，見到佢同以前有Ｄ唔同，未想問下妳佢呢排發生左咩野事囉。」七三廿一直接講左我地既來意。

「佢啊，好似話飛左條賤男囉，係ＦＲＩＥＮＤ先同你講，你好把握機會追拾拾，你知你以前有幾愛佢架啦，而家係機會啊，就唔快Ｄ上。」壹百一路講一路拍打七三廿一個膀頭。

「咁妳會唔會知果個賤男既野？」我問，而壹百就眼定定望一望我，然後又望返七三廿一話：「呢兩條友就係你同我講想知拾拾Ｄ野既人？」



七三廿一聽到壹百咁問後，點一點頭，而壹百就問我地：「咁你地之前知左幾多野先？」

「我地知到拾拾以前做援交，而七三廿一都係佢其中一個客，只不過七三廿一剩係比賤無搞野，大既呢Ｄ囉。」呢段就話係阿琪係我都未開口果陣已經講左出黎既野，壹百聽到後，不地點住頭咁望住七三廿一，然後話：「你都講左幾多野比佢地知ｗｏ。」

七三廿一傻笑，而壹百就笑而不語。

「其實我地仲想……」「等等，咁你地知唔知點解呢個人要比錢拾拾而唔搞野先？」壹百咁樣一講，我將本來想講既野停住左，而等佢繼續講埋落去，「我同拾拾好細個就已經係好朋友，一齊讀書，一齊玩，一齊長大，不過拾拾一直以黎都係好慘既人，因為佢有一個好賭既屋企，平時你地可能只會聽到一個家入面只有一個好賭，但係拾拾唔同，佢係一家都好賭，所以又細到大，佢都只係靠自己賺錢養自己。」

睇黎壹百諗住講拾拾既身世我地知，我諗實有排講，但我望一望阿琪，佢竟然流靈出一陣憐憫既神情。



「你地知唔知點解佢個名叫拾拾，係因為佢阿爸鍾意玩十五二十，成日一叫親『拾拾』都會贏，所以就叫佢做拾拾。」下？原來拾拾個名係咁樣改返黎架，「拾拾因為要自己靠自己，所以佢好努力讀書拎獎學金，但係始終唔夠佢屋企人用，仲有，有邊個賭仔唔欠債，拾拾最後為左幫屋伍人還錢，所以就出黎做援交。」

「拾拾好慘啊……」阿琪已經喊到收唔到聲……

「果陣讀緊書，拾拾好怕比其他同學知道佢做援交既事，所以除左我呢個由細到大識既朋友外，都唔會識其他人，但係某個角落，就有個ｏｎ９仔成日留意住拾拾。」佢望一望七三廿一，我諗所有人都會估到，果個人一定係佢。

「但係果個人呢，剩係夠擔望，但又唔夠擔行動，而拾拾都好搞笑，佢天生對男男女女呢方面唔係好擦覺到，但係從旁既人就好易睇得出，呢個男仔一定對拾拾有野既，係未啊，七三廿一？」呢一句係一個明知故問既問題。

「所以七三廿一想識拾拾，先會用錢搵做緊援交既拾拾但唔搞野？」我問。

「無錯。」壹百話：「但呢個就係一個不幸既開始。」