[愛情無限loop] 就係咁，我做左女神一年既備胎: ２０９　暴風雨過後

發生左呢件事既第二日，其實我成晚都無咩點訓到，因為成個腦都係諗緊Ｂ男既事。

我好早就企出左露臺，望住條街，唔知係未自己心入面作祟，成條空無一人既街，好似比暴風雨侵襲過一樣，但係，已經係暴風雨後既平靜。

就係呢個時候，老牛大人出現在係我身後，同樣地，又係一野打落我個頭：「你個死仔會咁做起身既？」

講真，今次堅有少少頭，我擦一擦頭上面頭既地方話：「訓唔著所以早Ｄ起身。」

「做咩訓唔著啊？又係果個女仔既事？」老牛大人問，而我就搖一搖頭。



我呢一個搖頭，老牛大人有少少驚奇，「估唔到咁快有其他女仔令到我個仔訓唔到覺ＷＯ，話我知係邊個？」

我嘆一嘆氣後，將拾拾既事、七三廿一既事、以及ＪＵＤＹ生日會上發生既事話左比老牛大人知，老牛大人聽到後，只係搖一搖頭話：「世間上總係有一Ｄ人不浪費佢地既青春，呢Ｄ人要到最後回望過去，先會覺得以前錯過一個又一個機會。」

老牛大人所講既野，我聽完笑左一下，呢個係認同既笑？定係呢個係感受緊既笑？就連我自己都唔知道。

而老牛大人就再講：「而家最大問題係Ｂ男既神出鬼沒會影響到你朋友既生活，你記住叫你朋友小心Ｄ。」

「知道。」我答老牛大人後，佢就行返入自己既房，而行入房之際，佢就講左句：「同朋友慶祝生日，都唔睇下自己屋企人就快生日。」



佢突然咁講，我計一計日期，原來老牛大人既生日就快到。

「咁你想點慶祝啊？」我問佢，而佢只係講左一句：「有件事我好想做但係到而家都未同你做，你自己諗下啦。」

咁我真係要諗下先得。