[愛情無限loop] 就係咁，我做左女神一年既備胎: ２０８　擔心

能蟹同阿珍因為同路，所以佢地兩個一齊返去，而我依然同阿琪一齊返屋企。

回家既路上，我地兩個一粒聲都無，唔係無野講，而係唔知應該點開口，因為今次件事我同阿琪都覺得幾嚴重下。

直到去到阿琪樓下，正想同佢道別之際，阿琪就問我：「你覺得Ｂ男既出現會唔會影響到ＪＵＤＹ同ＣＯＷ？」

無錯，呢個係我擔心緊既問題，但唔係最擔心果個，「ＪＵＹＤ同ＣＯＷ經歷左咁多野先可以係埋一齊，我相信Ｂ男既出現唔會對佢地有好大影響。」我講出左我既見解，呢個就係我唔係最擔心佢地兩個既原因。

「不過……」我欲言又止，阿琪見到我咁就話：「你話過咩都同我講架，快Ｄ講。」



「我比較擔心既係拾拾。」我話：「我而家記返起，我同拾拾相遇果一日，佢比一個男人打，而家先記起，果個男人係Ｂ男，仲有頭先ＪＵＤＹ話以前見過拾拾，佢地係一個唔適合既情況下相遇，而且Ｂ男既處理手法都唔多好，所以我而家最擔心既，反而係拾拾佢既安全。」

「其實點解果個Ｂ男會知道拾拾既位置？」阿琪問。

「呢個係一個迷。」我答。

同阿琪傾左一陣後，佢就返左上去，我見到，阿琪呢一刻露出左憂心既樣，佢係擔心ＪＵＤＹ同拾拾。

返到去，我即刻上網搵下有咩野方法可以得知道一個人既位置，好多都係話可能係電話果度裝左追蹤程式，如果係咁既話，呢個Ｂ男真係好怪。



過左陣我收到幾個ＭＳＧ，係七三廿一ＳＤ黎。

七三廿一：你地之後點？
我：留多左陣就走左
我：你同拾拾點？
七三廿一：我送左佢返去
七三廿一：但佢話而家好驚一個人
七三廿一：所以而家陪緊佢
我：咁就好
我：你好好照顧佢



而家拾拾有七三廿一睇住我都無咁擔心，而且佢地獨處既時候，希望可以解決佢地以前既事啦。

而我，就上床訓住睇緊自己既電話，咁岩睇到ＪＵＤＹ唱生日歌前ＰＯＳＴ上社交網站既相，相入面每一個人既臉都係歡欣，但係又邊個估度最後會發生呢Ｄ事。