[愛情無限loop] 就係咁，我做左女神一年既備胎: ２０６　不歡而散２.０

不速之客Ｂ男既突然出現同離開，真係搞串晒個ＰＡＲＴＹ，佢走左之後，能蟹同阿珍望住我地，原全唔知發生咩野先，而阿琪知少少既，只係好尷尬咁微笑望住我，我睇得出佢係想問我點算。

但係，我見到拾拾既不知所惜、ＪＵＤＹ既怒火、ＣＯＷ既不甘與七三廿一既無奈。

拾拾佢不知所惜咁低下頭，唔敢望我地，佢無諗過自己就係拆散左呢一位新認識朋友果個人，如果換轉係我，我呢一刻都只會低下頭，甚至已經走左。

ＪＵＤＹ既怒火，當然係來自Ｂ男，但係佢唔敢發出黎，只係企左係度緊握自己既拳頭，抿住咀，熱淚盈眶既佢不停向上望，就好似唔想比自己既眼淚流落黎，因為佢唔想再為呢個Ｂ男流淚。

而ＣＯＷ佢望住ＪＵＤＹ咁既樣，幫唔到佢，心中不甘點解自己深愛既女人仲要比呢個賤男Ｂ男傷害，而且仲要係今日呢一個咁重要既日子，佢不甘心睇住自己既女人受到呢一種折磨。



七三廿一既無奈，係佢都唔知而家呢一刻可以做到Ｄ咩，住係佢身邊既係佢以前愛過既女人，但係佢見到而家既拾拾，都唔知應該伸出援手好定點，最後佢選擇左沉默，而佢就係為左自己既沉默而感到無奈。

我面對住呢四個人既情緒，我知情既人都唔知講ｄ咩野好。

而好好彩，能蟹呢個時候講左句：「有無人可以話比我聽頭先發生左咩野事？」雖然佢呢一句係而家呢個時間講唔係幾合時，不過只要可以打破而家既局面，都不失係一句好說話。

而ＪＵＤＹ聽到佢咁問後，就好激動咁望住佢講：「你係未想知啊！你係未好想知啊！你係未真係好撚想知啊而家！！！」

我諗而家呢一刻，ＪＵＤＹ聽到咩野說話都會好激動。



能蟹慘變成炮灰咁呆左望住ＪＵＤＹ，而我地都一樣，ＪＵＤＹ就繼續話：「點撚解要咁啊！點撚解當我想安安靜靜同自己鍾意既人拍拖既時候！總要發生Ｄ咁既事啊！我好累啊！我而家只係想安安靜靜拍拖咋！」

ＪＵＤＹ佢不停將枱上既野掃落地，酒、小食、杯，甚至係我地一齊整既蛋糕。

我望住個蛋糕跌落地上面，諗返之前四個女仔一齊話要有個有好多士多啤梨既蛋糕，我地一齊去整，而家呢一刻，蛋糕仲未食過就跌左係地上面。

眼淚無情，滑過ＪＵＤＹ臉龐後跌落枱面，ＪＵＤＹ不停咁擦眼淚，仲邊擦邊話：「唔好喊啊！唔可以喊啊！我唔想再為Ｄ咁既人流眼淚啊！」

ＣＯＷ係呢一刻從後攬住左ＪＵＤＹ，然後話：「傻豬，妳呢Ｄ眼淚唔係為左果個男人，而係為左我地兩個而喊架。」



本身好激動既ＪＵＤＹ聽到ＣＯＷ呢一句說話，都軟化左落黎係度喊。

而我地可以做既，就只係企左係度睇住ＪＵＤＹ喊，而呢一刻，拾拾同ＪＵＤＹ講左句，「對唔住。」

ＪＵＤＹ只係望一望佢，然後話：「唔關妳事，妳都係受害者。」然後，拾拾都流下佢既眼流。