[愛情無限loop] 就係咁，我做左女神一年既備胎: ２０５　難忘既生日

「多謝。」ＪＵＤＹ好開心咁講完呢句多謝後，就吹熄蛋糕上面既蠟燭，除左我同拾拾，其他人都好開心咁笑緊，但係，呢Ｄ笑容慢慢咁一個一個消失。

第一個係坐係我旁邊既阿琪，佢見到Ｂ男後都嚇左一跳。

而能蟹都望到Ｂ男，不過佢唔知Ｂ男係邊個，只係露出左一副你係邊個既表情望住ＪＵＤＹ。

然後就係坐係拾拾旁邊既七三廿一，佢到Ｂ男果一刻開始，笑容已經無晒。

阿珍都一樣，佢都係用一個呢條撚樣係邊個既眼神望住Ｂ男。



然後係ＣＯＷ，佢見我地靜左咁，就望向後面，一見到Ｂ男後即刻企左起身。

「你做咩企起身啊。」ＪＵＤＹ望住ＣＯＷ問，然而，佢既目光慢慢移到ＣＯＷ所望之處，當佢由低處望住Ｂ男，就好似Ｂ男居高臨下咁，嚇到ＪＵＤＹ差Ｄ跌親，不過好彩ＣＯＷ扶住左佢。

「你點解係度啊！」「你點解係度啊！」「你點解係度啊！」唔係因為重要所以打左三次出黎，而係同一時間有三個人講左呢一句說話，係ＪＵＤＹ、拾拾同ＣＯＷ。

ＪＵＤＹ聽到拾拾咁講後，好愕然咁望住佢，拾拾都一樣，都係好愕然咁望住ＪＵＤＹ，佢地兩個之間無對話，只係有一種耐人尋味既眼神。

但係呢一個時刻，最重要既係Ｂ男出現左。



Ｂ男，佢見到ＪＵＤＹ都好似嚇左一跳，不過佢無表現得好明顯，只係嗤笑左一下後話：「真係搞笑。」

呢一句說話，我地不解咁望住佢，而佢仲笑得好大聲話：「我只係想搵返我女朋友，而唔係想黎慶祝妳既生日。」

唔知情既人聽到後，呆一呆，而ＪＵＤＹ就話：「我已經同你分左手！唔係你女朋友！」佢捉實左ＣＯＷ隻手話：「佢先係我男朋友！我呢一生最愛既人！」估唔到ＪＵＤＹ會對ＣＯＷ講呢一Ｄ說話。

不過，ＪＵＤＹ會錯意，「哈……」又係一陣笑聲，笑既人當然係Ｂ男，「我又話過係妳咩，不自量力。」如此挑釁既說話，令到ＪＵＤＹ火冒三丈，「你個仆街唔撚好係老娘既生日會亂鳩咁吠！」不停同我地講生日唔講粗口既ＪＵＤＹ，呢一刻都嬲到爆粗。

然而，Ｂ男一副樂得自助望向拾拾話：「佢係我女朋友，就係因為佢，我先唔要妳咋，妳唔好以為自己好巴閉啦。」一個一個字重重咁打係ＪＵＤＹ既腦入面，佢愕然咁望向拾拾話：「妳係……」



不知情既拾拾亦都愕然，過左幾秒先知道Ｂ男既說話：「我唔知果陣妳同佢……」一切說話，都唔係呢個場合講。

「呢度唔歡迎你！唔該你走！」阿ＣＯＷ話，睇得出佢好嬲，而Ｂ男就話：「第一呢個地方唔係你既你有咩資格叫我走，第二走唔走係我自己話事唔到你理，不過我都無諗住留係度。」佢笑左一笑住拾拾話：「估唔到妳會同呢Ｄ人一齊，真係好笑。」

「你快Ｄ走啊！」拾拾隨手拎起左Ｄ野扔向Ｂ男，不過好輕易比佢閃左，而Ｂ男就話：「今日本來想搵妳同妳講我地既野，但係而家都係唔阻住你地『慶祝』先。」佢仍然笑得好衰咁話：「生日快樂啊，妳呢一世都會記得今年個生日。」