[愛情無限loop] 就係咁，我做左女神一年既備胎: ２０４　ＨＡＰＰＹ　ＢＩＲＴＨＤＡＹ　ＴＯ……

好快就到ＪＵＤＹ生日果日，所有人都好期待，雖然聽日先係ＪＵＤＹ生日既正日，但我地諗住今晚同佢倒數慶祝，所以我地個個都覺得好興奮。

地點我地約左係尖沙咀既一間酒吧，我同阿琪例牌早到就一定，今次連能蟹都早到就好出奇，一去到約定地點，我地先叫左果度ｄ人幫我地雪住個蛋糕，同埋阿琪整左既小食，佢唔放心就咁比果度ｄ人拎入去，所以跟埋去睇。

而我同能蟹，就坐左係酒吧既窗臺位置。

「上次我講既野，你仲有無記係心上面？」我問能蟹，所問既係我無當佢兄弟果件事。

而能蟹就笑左笑話：「果日食飯你都道歉啦，而且男人唔記仇嘛，不過當你講左果句後，我自己都有諗過，其實我份人都係爭唔落，所有野都係得把口，做又做到甩頭甩尾咁。」



「都係架。」我笑住講得一副理所當然。

「你個死仔，三分顏色上大紅啊。」能蟹，兄弟算唔上的話，但點都係我其中一個最好既朋友。

「你地做咩密密傾咁啊。」呢把女聲我認得，係阿珍，「無，我地吹下……水姐……」能蟹講講下就慢左落黎，因為比面前既阿珍所吸引住。

可能我以前都無留意阿珍，原來佢打扮起上黎都可以好靚。

能蟹佢望住阿珍話：「如果我唔係有女朋友既話，我實追妳。」



阿珍聽到佢咁講後，反左下白眼，舉住中指話：「收皮啦。」

佢坐左埋黎，然後問：「其他人呢？」

而我就答佢：「阿琪拎左ｄ野食入去放，拾拾同七三廿一就好快就到，ＣＯＷ同ＪＵＤＹ當然就最遲黎啦。」

過多左一陣，好快就齊人，ＪＵＤＹ今日都有打扮一下，比起平時既佢，多左一份女人味，但唔知點解，我同阿琪望住佢笑左出黎，佢一見到我地兩個係咁笑，就話：「老娘今日生日，唔想講粗口，你地兩個好同我收聲。」

忍住笑既我問ＣＯＷ：「阿ＣＯＷ，你覺得ＪＵＤＹ今日點啊？」



ＣＯＷ好深情同ＪＵＤＹ對望，然後話：「好靚，佢今日真係好靚。」睇得出，佢係由心而發。

唔講咁多，生日會開始，我地一黎就叫左ｄ野食同埋酒，大家都話得好開心，有傾有講，係呢一刻大家既芥蒂都放下左，就連阿珍同阿琪都係，佢地好少何可以咁開懷傾計。

當中ＣＯＷ同ＪＵＤＹ兩個無時無刻都係度放閃，整到我同七三廿一呢ｄ單身狗好葡萄，不過ＪＵＤＹ就串我，「你葡萄ｄ咩野，你旁邊都有個啦。」

佢所講既人，當然係阿琪啦。

「就快１２點拿，不如我去拎個蛋糕出黎啦。」阿琪話。

「我幫妳。」我話。

「駛唔駛講一講你地兩個就搵機會二人世界啊。」衰妹，見係妳生日就唔同妳計。

而我同阿琪入到去拎野果陣，我就同阿琪講：「對唔住啊，佢把口係咁。」其實到而家我都好怕ｄ人拎我同阿琪黎講，因為我怕阿琪尷尬。



但係，阿琪反而話：「做咩對唔住啊，唔通你唔鍾意佢地咁講咩。」

「我……」我一時間唔知點答阿琪，而佢就笑我話：「快ｄ幫我拎個蛋糕出去啦。」

「知道。」我傻笑咁回應。

蛋糕放左係枱上面，「嘩！個蛋糕好靚啊！而且好多士多啤梨啊！」ＪＵＤＹ一見到個蛋糕就話，而七三廿一就係旁邊問：「係呢，唔知我地要放幾多枝蠟燭上去呢？３０幾啊ＪＵＤＹ？」

呢ｄ咁褸屌既問題，真係得佢一個先講得出，在場有幾個人都反晒白眼，而ＣＯＷ就話：「一枝就得架拿。」

我地插左一枝蠟燭係個蛋糕上面，點著左之後，能蟹就話：「唱生日歌！」

「ＨＡＰＰＹ　ＢＩＲＴＨＤＡＹ　ＴＯ　ＹＯＵ！」係呢個咁歡樂既時刻，一陣腳步聲慢慢接近。



「ＨＡＰＰＹ　ＢＩＲＴＨＤＡＹ　ＴＯ　ＹＯＵ！」黑影因為燈光慢慢染上顏色。

「ＨＡＰＰＹ　ＢＩＲＴＨＤＡＹ　ＴＯ　ＪＵＤＹ！」坐左係ＪＵＤＹ正前方既拾拾突然停左無唱，佢用一副好愕然既眼神望住ＪＵＤＹ既身後。

「ＨＡＰＰＹ　ＢＩＲＴＨＤＡＹ　ＴＯ　ＹＯＵ！」可能只係得我察覺到拾拾既愕然，我望向佢所望既地方，見到既，係Ｂ男企左係ＪＵＤＹ既身後。

「生日快樂！」全枱既人，除左我同拾拾，都好開心咁同ＪＵＤＹ講呢句生日快樂，ＣＯＷ就錫左ＪＵＤＹ塊面一下，ＪＵＤＹ洋溢出幸福既笑容，不過企係佢地身後既Ｂ男，表情就唔多好咁望住拾拾。