[愛情無限loop] 就係咁，我做左女神一年既備胎: ２０３　整蛋糕

（尋晚因為太忙無更新到，今日連放兩話，所以記住睇左２０２話「補返更新」先啊）

「你……你話你見到邊個話？」我問ＣＯＷ，而佢就再答多我一次，「我同先見到先前同ＪＵＤＹ一齊既男人。」

佢地兩個人既相遇，真係意料之外，我一直只係擔心Ｂ男會係有ＪＵＤＹ同拾拾在場果陣時出現既話會點算，但從來都無諗過ＣＯＷ見到Ｂ男會係點。

而我聽到佢咁講，就問佢：「……咁係無野嘛？」

ＣＯＷ就笑左笑答我：「其實無咩野啊，因為呢個人對我以後既人生黎講，已經唔重要。」



佢答得咁簫灑，真係難得，而我就同佢講：「佢地係入面買野買得好開心……唔好同佢地講你撞到果個男人ｄ野，費事佢地……」「費事佢地擔心，我知架拿。」其實我覺得呢個理由都好牽強，但估唔到ＣＯＷ會咁諗。

都好既，如果佢唔講既話，拾拾就唔會知道原來Ｂ男出現過。

但係點解果個Ｂ男點會係呢個時候出現係超級市場呢？

跟住落黎真係可以平安地咁買野，我地唔單止買左整蛋糕既材料，就買左好多唔同既零食以諗住一陣一路整蛋糕一路食。

係整蛋糕既期間，我收到阿珍既ＭＳＧ，其實今日我都有叫過阿珍黎，但係佢話唔想同阿琪有咁多交集，所以就算。



阿珍：你地整成點？
我：幾好啊
阿珍：你無比阿琪食左掛（喊笑）
我：妳唔好講到佢咁恐怖啦
阿珍：係你覺得佢係天使姐
阿珍：我總係覺得佢係個惡魔
我：妳未咁啦
阿珍：咁你地最後去左邊度整？
我：ＣＯＷ果度
阿珍：你地唔驚ＪＵＤＹ上去咩？


我：放心啦
我：我緊係收晒風先決定上ＣＯＷ度
阿珍：咁個蛋糕呢？
阿珍：整完放係ＣＯＷ度你地唔驚ＪＵＤＹ會搵到啊
我：……又係ｗｏ
阿珍：……（無奈）

就係阿珍既提醒下，我地整完個蛋糕後，決定由拾拾拎返去，而拾拾都好樂意，係整蛋糕既期間，我同阿琪不時留意住拾拾同七三廿一，佢地兩個其實心入面係好開心，但係二人就不停咁壓抑住自己既心情。

唔知情既阿ＣＯＷ問我：「佢地兩個係未對相方都有意思架？點解佢地兩個接觸怕怕羞羞咁。」

我同阿琪聽到後都笑到傻左，其實如果唔知情既話，旁人可能真係有ＣＯＷ呢一種諗法，但係如果係知情既人，姐係我同阿琪，只會覺得緣份仍然玩弄緊呢兩個人。