[愛情無限loop] 就係咁，我做左女神一年既備胎: １９８　準備ＪＵＤＹ生日

原來拾拾同七三廿一有一個咁既過去，但係就係呢Ｄ野令到七三廿一想成為一個壞男孩？

同拾拾收左線後，我訓左係床上面，ＪＵＤＹ因為欲ＣＯＷ既一次分別先識得珍惜，然後佢地先係埋一齊，咁唔通拾拾同七三廿一都係一樣？

一個等左佢十年既男仔，等到最後仲要放棄自己一直堅持既信念，佢會回頭咩？

我就係呢個疑問下訓左，到第二朝醒返，見到電話收到既係阿琪既ＭＳＧ以及拾拾既ＭＳＧ。

阿琪果Ｄ都係平時我地日常既對話，所以無咩特別，而拾拾果一個ＭＳＧ，就好似尋晚所講既野一個總結。



拾拾：時間就係我同七三廿一既最大敵人，我浪費左七三廿一佢十年既時間，唔通我要等返佢十年？

我望住呢個ＭＳＧ之後笑左一下，等一個人真係咁簡單咩？我自己經歷緊好明白當中既心情，而以前係七三廿一等拾拾，如果真係兩個人既身份調轉，拾拾真係等得到？

過左幾個跑步活動，係呢段時間，只要有七三廿一既地方，拾拾都會出現，但係七三廿一就用形同陌路人既身份面對拾拾，就算拾拾上前主動同佢傾計，佢都只係講左兩句就行開。

每次我望到佢地兩個咁，都會行過去問七三廿一，問佢：「係未能蟹教過你要令Ｄ女仔望動搵黎講野，你先咁樣對拾拾？」

而七三廿一聽到我咁問佢後，就答我：「唔係，只不過係我仲未知道點面對佢。」



唔知點面對佢？已經見左幾次都仲未知點面對佢，「咁你對拾拾係未已經無左果份愛？」我問七三廿一，而佢就只係不停咁回避我呢個問題。

隨左拾拾同七三廿一既事外，其實仲有一個隱藏既炸彈，就係Ｂ男，呢幾次跑步活動佢雖然無出現到，但如果有一日，ＪＵＤＹ在場邢Ｂ男真係出現既話，到時真係唔知點算。

「做咩呢幾次跑步活動你都咁沉重既？」被我送緊返屋企既阿琪問我，我地剛剛完左呃步活動。

「我覺得拾拾同七三廿一，好似比時間玩弄咁。」我將自己現時既內心感覺講左出黎，而阿琪就話：「係架，時間永遠都鍾意作弄人架啦，人可能可以改變到自己，但係就唔可以改變到時間。」

我嘆左口氣話：「本來可以成為一對既佢地，而家變成咁。」



「唔好諗呢Ｄ啦，不如諗下點同ＪＵＤＹ慶祝生日仲好啦。」係ＷＯ，個衰妹就黎生日ＷＯ，「唔知佢鍾意食Ｄ咩野味既蛋糕呢？等我整比佢食先我。」阿琪好開心咁話。

「唔知啊，駛唔駛我幫妳問佢？」我問阿琪，而阿琪就話：「都好，到時叫埋ＣＯＷ、能蟹同埋阿珍佢地一齊黎，多Ｄ人玩好玩Ｄ。」

我聽到阿琪口中講阿珍呢個兩個字，唔知點解總係有Ｄ怪，阿琪唔會知道阿珍因為唔想我繼續追佢而講佢既壞話，「……但阿珍唔知會唔會黎。」我同佢講。

「應該會既，ＪＵＤＹ生日咁大件事ＷＯ。」阿琪話。

如果真係咁簡單既話就好，不過ＪＵＤＹ生日阿珍應該唔會點掛。