[愛情無限loop] 就係咁，我做左女神一年既備胎: １９６　ＯＮ９傻笑（補返更新）

返到屋企後，見到既係剛出院既老牛大人，「你個死仔，你阿爹出院都唔黎接我，真係……搞咩你笑得成個ＯＮ９仔咁啊。」老牛大人咁好中氣，一定仲好老當益壯。

而點解佢會話我笑到成個ＯＮ９仔咁，因為由頭先聽到阿琪講果句說話後到而家，我都不自覺咁笑左出黎，果種喜悅唔知點解好難按奈住。

老牛大人行到我面前，拍左我塊面幾下，「有咩好事發生左你笑到咁ＯＮ９啊？」佢問我，而我就笑住答：「無啊。」

佢聽到我呢個「無」字，露出左一個不詭既眼神，「睇你咁既野，一定係關於Ｄ女啦……係未你個阿琪啊？」其實比自己阿爸知道自己追緊個咩野女仔都唔係一件好事，因為只要你係佢面前有少少開心既表現，都會以為係關於佢，雖然，今次既傻笑真係關於阿琪。

「你未理咁多啦。」我諗好多朋友係呢個時候都會咁樣回應你地既屋企人，我都唔例外。



而老牛大人聽到我咁答佢，就只係嘆一嘆氣，「睇黎個仔都係中毒已深。」

咩野中毒啊……

阿媽就係呢倨時候係間房叫左出黎，「你就由得牛仔想點做就點做啦，不過呢……」佢一邊講一邊走左出黎話：「有咩野老豆就生個點樣既仔，佢未好似你以前咁樣囉。」

老牛大人聽到後就話：「我邊有個仔笑得咁ＯＮ９。」

「係係係……係個樣最醒。」阿媽推住老牛大人一齊返入房，而係就入房既一刻，佢就望住我好細聲咁同我講：「佢果陣仲ＯＮ９過你啊。」



我聽到後笑左出黎，而老牛大人就話：「我聽到妳講咩野架。」

不過其實呢份喜悅可以同自己身邊最親既人分享，都係一件唔錯既事，不過我既朋友就……

就係呢個時候，我電話響左一下，「你條女搵你啊！」老牛大人係自己既房大叫左出黎，然後就係佢比阿媽打左一下既聲音。

我滿心期待拎起個電話一睇，原來係拾拾ＳＤ左個ＭＳＧ比我。

拾拾：估唔到事情會拾到咁
我：妳意思係妳前男友黎左？


拾拾：係啊
拾拾：仲有既係見返七三廿一
我：其實我之前都只係估妳會唔會係佢口中講果個等左十年既人
我：今日終於知道左我既諗法係正確
拾拾：我見返佢果一刻真係有少少呆左
拾拾：唔知比Ｄ咩野反應好
我：七三廿一都係一樣
拾拾：其實七三廿一同你講左我幾多野？
我：佢講左等左妳十年，十年入面妳都無揀佢同另外Ｄ男仔一齊
拾拾：就得呢Ｄ？
我：仲有妳為左一個男仔去墜胎，而且叫左佢去陪妳
拾拾：係
拾拾：咁佢有無講過，我以前係做過援交？
我：下！？妳做過援交！？
拾拾：睇黎佢無講你知


拾拾：估唔到佢到而家都一直保護緊我

同拾拾呢幾個ＭＳＧ下，我知左件咁既事，都有少少震驚。