[愛情無限loop] 就係咁，我做左女神一年既備胎: １９５　耳語

今日既跑步活動就係呢個衝突下畫上句點，而大家都話一齊去食飯，但係我今晚有Ｄ工作要返屋企做，所以話要早走，而阿琪見到我早走，佢話唔食，跟住拾拾都話想快Ｄ返屋企驚留太夜，而七三廿一都話有Ｄ野做要早走。

就係咁我地四個人無去到食飯就返屋企。

我同阿琪返屋企係同路，而七三廿一同拾拾就係另一邊但同路，所以我就同七三廿一講：「今日你送拾拾返到屋企先準走，以免果個男人又再出現。」

七三廿一聽到後，其實有少少面帶難色，可能係因為尷尬掛，而拾拾都係一樣，但係佢怕Ｂ男又再出現，所以佢就問七三廿一：「你可唔可以送我啊？」

「……好啦。」七三廿一點一點頭，唔知佢地撞返後會有Ｄ咩野傾呢？



我同阿琪向佢地道別後，阿琪就問：「你估佢地有咩野講？」我同阿琪真係心有靈犀，諗埋同一樣野，「有兩種可能性，一就係好開心咁傾返以前既野，一係就好靜咩都唔講直到返到屋企。２

「咁又係，如果佢地係尷尬既話，一定唔會點講野。」阿琪話，然後又開始另一個話題：「係呢，頭先你見到Ｂ男果陣係咩野反應啊，我成個人都Ｏ晒咀啊。」

「我都係，我都唔知應該點反應，而且上次同拾拾識果陣，原來果陣打佢果個人就係呢個Ｂ男。」我話，而阿琪聽到後都好驚訝話：「估唔到呢個賤人會咁樣對女人，都唔知佢以前有無咁樣對過ＪＵＤＹ。」

然後阿琪望一望我，就話：「你頭先都打人ＷＯ，唔知你會唔會打女人呢？」

佢呢一個問題，令我突然成個腦都實晒，我會唔會打女人？我想答唔會，但係……



阿琪見到我成個人好似比人點左穴後，就笑住話：「我講笑咋，你呢種人咁老實，又點會打女人ＷＯ。」

佢既微笑真係好似天使，如果我可以係佢面前懺悔就好，可以將我以前既罪行都減輕，但係而家佢係我想追既人，呢樣野係未唔應該話佢知。

送到佢去樓下後，阿琪行入樓之際，佢轉過身同我講：「阿牛啊，我覺得近掛ＪＵＤＹ佢地好似好刻意咁避開我，唔知我係未做錯Ｄ咩野事？」佢既神情係一副擔心。

「妳無事啊……」其實唔關阿琪事，只不過係因為我鍾意佢，而佢地唔想我同妳一齊姐，所以先會咁，唔關妳事架阿琪，「……可能佢地忙姐。」我只可以搵呢個借口講比阿琪知。

「係就最好啦，好耐無見佢地，唔知佢地點呢？」阿琪無入到樓，行到我面前話：「我怕好似我以前Ｄ朋友咁，無啦啦因為感情既問題而避開我。」阿琪講中左，但係我唔可以比佢知道佢講中。



「我真係好想同一個朋友到求遠架，但係友誼永固呢四個字好似永遠同我過唔去咁。」阿琪有少少失落。

而我見到咁樣既阿琪，就同佢講：「我係唔會比你無朋友既，至少到最後妳真係一個朋友都無既話，仲有我。」

阿琪聽到我講呢句說話後，好開心咁笑左出黎，然後慢慢咁行近，頭慢慢哄左過黎，係我耳邊講左句：「你真係只想做朋友咩？」

突然臉上一股熱，我諗係我臉紅，而阿琪講完呢句後就立即回頭，無望我一眼，「你都早Ｄ返去拿，拜拜。」佢話，然後就入樓。

而我就好似碌木咁企係原地，頭先阿琪果句話，算唔算係同我講叫我放心繼續追佢呢？