[愛情無限loop] 就係咁，我做左女神一年既備胎: １９４　Ｂ男出沒注意

世事就真係咁樣，唔好話你地唔信我眼前果個男人係Ｂ男，就算我同阿琪親眼望住Ｂ男都唔係好信。

我再回憶返，原來上次去長洲果陣，打拾拾果個男人就係Ｂ男。

真係呢，我同阿琪呆到原地企左係度Ｏ晒咀，而果位Ｂ男就捉住左拾拾隻手話：「點解唔聽我電話！」佢好激動咁講，而且睇得出佢好用力咁捉住拾拾隻手，因為拾拾試過爭扎但係唔成功。

「我再問妳多一次！點解唔聽我電話！」Ｂ男呢一次講得比上一次大聲，引黎唔少既目光，而拾拾就露出一個好痛苦既表情話：「你快Ｄ放開我啊。」

呢個時候，係未應該有一個人出黎幫拾拾呢？我搵緊七三廿一既身影，只係見到遠處既佢其實已經望住一切既發生，但係佢一臉既茫然，完住無衝過黎幫手既衝動。



咁……姐係得返我？阿琪呢一刻都拍一拍我，示意我過去幫手。

我上前推開左Ｂ男，「先生，你做咩野？」我推開左Ｂ男，而且仲要扮到唔識佢咁問佢呢個問題。

而Ｂ男比我推開後，好快又衝左上黎推一推我話：「我地兩個既野你唔好多事。」佢好惡咁望住我。

通常面對呢Ｄ惡人，我只會用一個方法對佢，就係要惡過佢，「而家佢係我朋友就關我事！」我呢一聲大喝，換來既係佢既怒視。

「係未就係呢條仆街所以妳要同我分手？」Ｂ男問，下？等等？事情會唔會進展得有Ｄ好笑呢？點解Ｂ男會問條咁既問題。



而拾拾就答佢：「我既事唔關你事。」嘩……拾拾妳呢個答案真係可圈可點ＷＯ。

Ｂ男聽到拾拾咁講後，就話：「咁姐係代表係啦！」佢剛剛講完，就已經一拳打左過黎，不過好彩我都唔弱，避開左佢呢一拳後一腳踢開左佢，然後話：「你條撚樣唔好再係度搞事，唔係對你無咩好處。」

而家呢一刻，ＧＲＯＵＰ果Ｄ人先慢慢走過黎問：「無事嘛你地？你係邊個啊？」

Ｂ男見到人多起上黎，就話：「你好野，呢件事我唔會就咁算。」

唉……每次開拖都有手尾跟，我諗呢次都唔例外。



Ｂ男走左之後，我行返阿琪既身邊，而阿琪就好擔心咁問我：「你無事嘛？」我答佢：「無事。」然後就係拾拾走過黎：「唔好意思，我無諗過佢會黎呢度。」

「點解佢會知妳黎呢度架？妳講佢知架？」我問佢。

「我都唔知點解佢會知，每次佢要搵我，一定會搵到。」拾拾講完後，我都唔明點解Ｂ男會知道佢黎呢度。

不過唔緊要，而家最重要既有兩件事，第一件事，就係七三廿一而家係邊？我四圍搵佢，原來佢匿左係人群後面，我行到佢面前然後細細聲問佢：「做咩頭先拾拾比人捉住果陣你唔衝過黎？」

「我……」七三廿一好想搵個借口答我，可惜到最後都搵唔到，只係講左句：「對唔住，唔知點解頭先無上前既動力？」

「點解無？」我問佢，而七三廿一就好誠實咁答我：「因為果個男人就係搶走拾拾既人……」

明白晒，原來出於自信既問題所以佢無衝過黎幫手，我望住七三廿一，嘆左一口氣話：「你要記住，就算佢曾經搶走過拾拾，都唔代表佢可以傷害拾拾而你袖手旁觀架。」

七三廿一一臉悔意點一點頭，希望佢真係明白。



而第二件事，就係Ｂ男又再出現，如果有一日ＪＵＤＹ在場而Ｂ男又衝左出黎搵拾拾既話，都唔知點算。