[愛情無限loop] 就係咁，我做左女神一年既備胎: １９３　香港真係細

七三廿一行到過黎，第一句就問：「你同拾拾識架？」

我對佢點一點頭，然後佢就繼續問：「點識架？識左幾耐？好熟架你地？你同佢係咩野關係？點解佢要入ＧＲＯＵＰ？佢……」

一大堆問題連環炸落黎，我只好停住佢既問題，「你等等先好唔好。」然後就答佢：「去長洲識。識左幾星期左右。話熟又唔算，唔熟又唔算。朋友關係。唔知點解要入ＧＲＯＵＰ。」

「咁佢……」「你停一停唔好問野住先。」我講完後，七三廿一就望住我，而我就問佢：「拾拾，係未就係你先前講等左十年既女仔？」

七三廿一聽到我咁問後，點一點頭，而我又問：「咁點解頭先你扮晒唔識佢？」



「我……」七三廿一吱唔左一下，「……我都唔知點樣面對佢，以前佢係我好鍾意既人，但而家……」

「而家唔係？」我問，而七三廿一就話：「唔算唔係，因為最近我都試過叫自己鍾意其他人，但係仲未有一個睇得上眼。」

「咁姐係最愛果個？」我問。

「我唔知道啊，總之我而家就覺得一見返佢既感覺唔同晒。」聽到佢呢句之後，我停左係度無左跑，而佢見到我突然停低，差Ｄ收唔切制跌親。

當佢望住我既時候，我就話：「其實你而家最要睇清楚既係自己，你已經將自己變成一個連自己都唔熟識既人，我問你，你呢一段時間同能蟹一齊晚晚去飲野，真係開心咩？」



七三廿一比我咁樣一問我，低下頭。

「你諗下當你不停咁諗方法去令到Ｄ女仔注意你，你真係開心咩？」我每一個問題，都令到七三廿一佢個頭低得更低。

「你諗下當你每次Ｄ女仔話你好迫哄人果陣，你真係覺我佢地賺你？你真係開心咩？」七三廿一今次搖一搖頭。

而我行到去佢既面前，同佢講：「你想做壞人，我唔會理你，但係如果要做，都唔好無左自己。」

七三廿一一臉茫然咁望住我問：「我係未做錯左？」



佢而家既表情，好需要一個答案，但係呢個答案，唔可以由我把口講出黎，「要知道係未做錯既，只有你自己先可以證明。」我講出左個方法後，就繼續跑步，而阿琪就係呢個時候跑左過黎，問我：「頭先同七三廿一講左Ｄ咩啊？」

我望一望佢後話：「我只係叫佢諗清楚自己之後要做Ｄ咩。」

阿琪無再問落去，只係安安靜靜咁陪我跑步。

跑多左一陣都應該夠，我就同阿琪去左水機飲水，而拾拾呢個時候就走左過黎話：「呢個號ＧＲＯＵＰ都幾多狗公架ＷＯ。」

佢向我同阿琪ＳＨＯＷ一ＳＨＯＷ佢手機既ＭＳＧ，突然多左好多不知明既電話號碼ＳＤ　ＭＳＧ比佢，我同阿琪睇到後，只係笑左笑話：「妳以後就會慣架拿。」

而係呢個時候，拾拾既電話響起，不過佢無接度，「邊個黎架？」阿琪問，而拾拾就答佢：「無啊，個ＥＸ打黎姐，唔想聽。」

但係佢需然無接聽，不過身後就企左個人，一個拎住個電話既人，「點解唔聽我既電話。」個男人問緊既，應該係拾拾。

拾拾聽到男人把聲，嚇左一跳後轉身望住個男人，而我同阿琪一見到個男人，都呆晒，唔係因為個男人突然出現而呆晒，而係呢個男人係我地之前見過既人。



我好記得，果日見呢個男人，係同一杯大檸樂有關，而呢個男人，就係先前同ＪＵＤＹ有段關係既Ｂ男。