[愛情無限loop] 就係咁，我做左女神一年既備胎: １９２　從遇

時間一分一秒咁過，我同阿琪係運動場入面，七三廿一都到左，而家，我同阿琪既心情全部都放係拾拾黎到。

跑左咁上下，見到Ｄ新ＭＥＭＢＥＲ都到晒，唯觸拾拾仲未見人，我同阿琪都覺得可能係因為拾拾黎左但見到七三廿一係度，所以走左。

但係當我同阿琪有咁既諗法之際，拾拾就係遠處揮住手過緊黎，「唔好意思，頭先我自己跑，所以而家先過到黎，你地好啊，我係新加入既，我叫……拾拾。」

拾拾佢好明顯停左一停先講自己既名，因為果一下，佢見到七三廿一，而我地見到七三廿一既表情，佢一開始係有少少驚訝，但之後佢就扮晒無事，甚至，係扮唔識拾拾。

「妳好啊，我叫七三廿一。」佢伸出手想同拾拾握手，而其他狗公成員就起哄，「七三廿一咁快就出手，真積極。」



但係，七三廿一同拾拾都無理過佢地既說話，拾拾都伸出手，「你好。」一對本來認識既朋友，甚至其中一方係愛過另一方既兩個人，如今，竟然扮做陌路人。

唔知道佢地兩個以前既事既人，可能睇唔出佢地係到扮緊，但係略知一二既我同阿琪，就好清楚見到佢地尷尬咁微笑。

而所有新成員介紹完畢後，拾拾就走過黎我既身邊問我：「果個女仔係未你鍾意果個啊？」佢竟然係問阿琪既野，我仲以為佢會問七三廿一既野。

「係啊。」我答佢，而佢就笑笑口話：「幾有眼光ＷＯ阿牛。」

雖然佢講得都算輕鬆，但係都睇得出佢既尷尬，而我就話：「係呢，妳同七三廿一之前係未識架？」



佢咁樣比我一問後，就有少少帶有保護既眼神望住我問：「你點知架？」

「其實呢，你地既事我先前都估到，因為七三廿一同我都幾熟，又講過佢以前既事，而妳又有同我講過以前既事，咁岩兩個人既事有咁相似，所以……」我愈講，拾拾就用一個埋怨既眼神望住我問：「點解你唔一早同我講？」

「我點會知我估中姐。」我是但諗左過答案答佢。

「咁又係……」佢講完後就望向一直都留意緊我地既七三廿一，「我都無諗過咁樣撞返佢。」

「咁唔好咩，妳先前話要搵過妳直得去愛既人，七三廿一對妳咁好，妳應該揀佢。」我話，而拾拾就講：「我都知，所以我都想比個機會佢，只不過頭先一見面果陣，我對佢既感覺陌生左，而且，佢好似唔想我認得佢咁。」



「會唔會係妳錯覺啊？」我仍然繼續是但搵Ｄ野黎講，因為面對住佢地兩個，我都唔知講咩好。

「唔知啊，總之個感覺就好特別，而且，我感覺到我已經唔係佢最愛果個。」拾拾一口咬定咁話。

咁佢咁講都唔係無道理，呢一排七三廿一真係好積極識女仔，佢話要為左過去無嘗試愛其他人既十年一次追返晒。

不過而家拾拾既出現，唔知佢會點諗呢？

同拾拾傾傾下，阿琪就行左過黎，「你今日出黎傾計架，唔跑步既。」阿琪咁問後，拾拾就對住我笑得好不詭咁話：「係囉，阿牛，去跑步啦，有人呷醋啊。」

估唔到拾拾第一日入ＧＲＯＵＰ咁快就識我拎我同阿琪黎講笑，呢個衰妹真係。

「好啦，咁我去跑步，你地兩個識下啦。」我講完之後就去左跑步，而跑步既時候……就輪到七三廿一跑左過黎。