[愛情無限loop] 就係咁，我做左女神一年既備胎: １８８　愛情，係一剎那既衝動

阿媽佢笑左一笑，然後話：「最初識你阿爹果陣，就覺得佢係一個好好既男仔，點解呢個世間上有一個咁好既男仔，但係就無女人鍾意呢？佢既好，係好到可以為左我去放棄自己好多野，到最後，我先知道原來佢一直都鍾意我。」

我聽到阿媽咁講後，就呆左一呆，原來唔係老牛大人等左阿媽好耐，而係阿媽到好後期先知道老牛大人係鍾意佢。

「但係阿爸果陣無做Ｄ咩野令妳覺得佢鍾意妳咩？」我問，而阿媽就答：「真係唔覺ＷＯ，只係覺得一有事發生，第一個出現既一定係佢，佢係一個好好既朋友。」

我聽到後嗤笑左一聲，究竟係老牛大人果陣做得唔夠出面，定係阿媽佢聽生反應遲鈍呢？

「咁妳又係幾時開始鍾意阿爸架？」我問佢，因為我真係好想知道，老牛大人係做左Ｄ咩野，令到阿媽鍾意佢。



阿媽佢微笑左一下，呢一笑，好甜，「牛仔，你知唔知道，當你係一個險境果陣，最想既野係咩野？」

我諗左諗就話：「緊係逃命啦。」

阿媽聽到我呢個答案後，笑得好大聲話：「都岩，不過我當時唔係咁諗，我反而係諗，你阿爹幾時先會黎救我。」

佢靜左一靜，然後好語重心長同我講：「有好多人話，當危難關頭既時候你第一個諗起既人，就一定係你最在意既人，果一刻，我諗既人係你阿爹，我好想佢黎救我，而唔知係未上天聽到我既心聲，阿爸就係危機當中，將我救左出黎。」

「英雄救美！？」呢個係我聽完阿媽講既野第一個反應，而阿媽聽到後就笑笑口話：「我係美就一定架啦，至於你阿爹係未英雄就唔知拿。」



我聽到佢咁講後都笑左出黎。

而佢就繼續，「但無論你未英雄，當你見到一個人肯為自己連條命都可以唔要，奮不顧身去救你既時候，果一刻，你就會明白，你唔會想錯過呢個人，就係呢一刻，我鍾意左你阿爸。」

「咁……所以……」「所以我同你阿爸唔係日久生情。」我未問完阿媽就答左我既問題，而我，就發問我第二條問題：「咁係Ｄ咩？」

「愛情，係一剎那既衝動，當你愛上一個人既時候，真係唔知係點解，就好似一個宅男本身唔識同異性溝通，但當感受到真愛係面前既時候，都會作出最大既勇氣展開第一步，就算係無結果，佢地都為真愛奮鬥過。」阿媽講講下，就摸一摸我既頭，「呢一點你應該知架，你上一段感情就係咁樣黎架啦。」

我回想係我上一段感情既開始，無錯，本身既我好少同異性接觸，但當我覺得前度係真愛果陣，我又會好主動去追求。



「記住，衝動唔係一件壞事，因為愛情係雖然勇往直前，而感情既話……」阿媽佢慾言又止，而我就問：「感情係點啊？」

我只見到，阿媽只係笑左一笑，「就等你再度擁有愛情先講啦。」

呢一晚，聽完阿媽既說話後，我諗左成晚。

我愛上阿琪既衝動已成事實，但係阿琪仲未對我有愛既感覺，如果聽阿媽講，佢同老牛大人唔係日久生情既話，咁樣，我係未應該要令阿琪對我有一剎那既衝動？

但係，唔通為左呢一下衝動，要令到阿琪身陷險境咩，無可能既事啦，就算有可能，我都唔想阿琪有危險。

而係我諗緊之際，電話響起，而且係兩聲，我睇一睇電話，一個係阿琪，另一個係拾拾，佢地既ＭＳＧ如下。

阿琪：你爸爸無事嘛？

而拾拾就係……



拾拾：我決定，放棄我而家呢一位男朋友，去搵一個直得我愛既人