[愛情無限loop] 就係咁，我做左女神一年既備胎: １８７　突然的消息

睇返果Ｄ　ＳＤ比我既ＭＳＧ，大部份都係阿琪，差唔多都係問我做緊咩，做咩唔應機，叫我覆返佢。

其實，一個人好關心一個人，係未都係會做呢Ｄ舉動？

我：我今日去左做野好忙
我：所以無時間覆妳
我：對唔住

我又呃左阿琪。



阿琪：我以為你有咩事啊
阿琪：又唔知係未我做左Ｄ咩整到你唔開心所以唔應我
阿琪：嚇死我拿
我：唔會
我：妳點會令到我唔開心ＷＯ
阿琪：咁你忙完未啊？
我：忙完拿
我：而家返屋企
阿琪：咁你返到去早Ｄ休息啊



覆完阿琪再睇其他人ＳＤ比我既ＭＳＧ，果Ｄ都係普通既吹水話題，直到，我睇到一個ＭＳＧ，我呆左，果個係我阿媽ＳＤ比我既ＭＳＧ。

媽：你阿爹入左院，快Ｄ過黎

我見到呢個ＭＳＧ即刻打比我阿媽問老牛大人入左邊間醫院，一收到地址就飛的趕去。

係的士上面，我睇返呢個ＭＳＧ　ＳＤ過黎既時間，係六個小時前，唔知老牛大人發生咩事呢？你千其唔好有事啊。

而我仲有ＳＤ　ＭＳＧ話比阿琪知老牛大人入左醫院既事，佢都好緊張咁不停問我點解會咁。



但係，我都未去到醫院，都答唔到佢明確既情況，一去到醫院，我就即刻街上去老牛大人間房，「阿爸你點啊？」

「咁早啊你，食唔食生果啊？」老牛大人好精神咁坐左係床上面食緊生果，而阿媽就好攸閒係旁邊住坐睇緊自己電話。

見到老牛大人無事，擔心既心情即時減左一大半。

「仲咩入醫院啊，阿爸？」我問老牛大人，而老牛大人就答：「比你激道囉。」我聽到反一反白眼，行到去床邊，然後問阿媽：「發生左Ｄ咩野事？」

阿媽就答我：「你阿爹無啦啦暈低，嚇到我唔知點算，未送佢黎醫院比醫生睇下囉，醫生叫佢留院觀察啊。」

「我都無事，不知幾精神。」老牛大人講完後好大力咁拍打自己既心口，我見到當堂呆左。

「精你條命咩，頭先阿仔唔係度先話個頭又痛，條腰又酸。」阿媽講完後就放低部電話同我講：「一陣你同我一齊返屋企，執幾件衫比你阿爸。」

「知道。」我點頭回應，然後坐多左陣就同阿媽佢返屋企執幾件衫比老牛大人，而期間我就話比阿琪聽我阿爸無事，佢先無咁擔心。



而我ＳＤ完ＭＳＧ比阿琪後，我阿媽就問：「ＳＤ　ＭＳＧ比女仔啊？」

係全世界既阿媽都知道自己個仔既心事？定係我唔識得收埋呢？佢咁都知，「無啊。」

「仲話無，通常你地Ｄ男人ＳＤ　ＭＳＧ偷笑一定係同緊女仔傾計。」阿媽又會咁醒既，唔得，要轉移話題先得，「咁阿爸有無ＳＤ　ＭＳＧ果陣偷笑啊？」

「佢敢咩。」阿媽好有自信咁話，然後又問我：「果個女仔，係未就係你鍾意果個女仔？」下！？阿媽又會連呢Ｄ都知道既。

佢望住一副疑惑既我話：「每次你同你阿爹夜晚傾計傾得咁大聲，我緊係聽到啦。」

竟然係咁，睇黎我下次要再將自己既聲浪收細先得。

橫店阿媽都知道左，我就直接問佢：「阿媽，阿爸話以前佢係等左妳好耐，妳先會同佢一齊，係未真架。」



阿媽聽到後笑左笑話：「雖然講都無人信，我自己都唔係好信，不過，係真既。」

「點解妳自己都唔信啊？」我問。

「因為你阿娘我係唔相信日久生情呢回事。」阿媽講完後，我更不解。