[愛情無限loop] 就係咁，我做左女神一年既備胎: １８６　拾拾

我坐係呢個女仔既旁邊，直到另一個女仔返左黎，「喂，你係邊個？」佢問我，而我只係好簡單咁答佢：「我只係個路人。」

起返身，拍一拍屁股上面既沙後，正想離開之際，頭先喊過既女仔就問我：「你叫咩野名啊？」

「阿牛。」都係好簡單就講左出口。

「我叫拾拾。」呢個名真係同七三廿一有得比。

「拾拾，妳做咩隨便咁識一個路人啊，仲要係一個咁宅既路人。」唔知點解我聽到呢個女仔講野，想一巴升過去。



「妳唔好咁啦，我頭先同佢傾左一陣，覺得佢唔係一個壞人。」拾拾微笑左一下，然後又問果個女仔：「係呢，有無追到我男朋友？」

「無啊，佢不知行得幾快，追唔到諗坐返黎叫埋妳走，點解，就入夜拿，妳走唔走啊？」果個女仔拉起左拾拾，而拾拾就話：「知拿，妳等多我一陣啦。」

然後，拾拾行左過黎我度，「比你電話我，唔知點解，我覺得我地以後仲有幾會見面。」

我呆左一呆，估唔到平時未試過比人抄牌，今日入黎長洲就比個女仔問電話。

我講左個電話比佢知後，佢地就走左，剩低我一個係呢個沙灘度，我不停諗，唔知同事拾拾口中所講既人，會唔會係七三廿一呢？



但係世事邊會有咁巧合先得架……

我拎起飲剩既啤酒，繼續望住呢個海，直到天慢慢黑，我先離開呢個沙灘。

無諗住過夜既我，係長洲自己一個人食左Ｄ海鮮後就坐船走，拎返部電話出黎，見到既，係一大堆既ＭＳＧ。

本來我連ＭＳＧ都唔想睇，不過見到其中有一個係我未見過既號碼，所以我開左黎睇，原來，係拾拾。

拾拾：你覺我，我應唔應該搵返先前對我好既男仔？
我：其實妳一早知道要點做


我：點解要借我呢一位陌生人既口話妳知
我：而唔係妳自己去做？
拾拾：你都講得岩
拾拾：好高興識到你呢個陌生人

唔知點解，我對呢一位新認識既拾拾無咩抗拒感，而且覺得，我同佢一定可以成為好好既朋友，所以，我同佢講左我入長洲既事。

我：其實
我：我今日自己一個人入長洲，都有Ｄ心事
拾拾：咁可唔可以話比我呢一位陌生人聽？
我：我鍾意左一個女仔
我：開始既時候我Ｄ朋友都會支持我去追呢個女仔，但慢慢地，佢地覺得呢個女仔同我係唔同世界既人，甚至，呢個女仔好有可能會受害到我
拾拾：所以你唔知應該追落去定係放棄？
我：嗯
拾拾：咁你今次點解會一個人入長洲？係因為太煩？定係想諗清楚件事？


我：因為太煩
拾拾：咁既話，你就繼續照你意思去追果個女仔啦
拾拾：因為你今次既心事，係來自你Ｄ朋友講你鍾意果個女仔既壞話，先開始有動搖姐
我：但係，如果我鍾意呢一個女仔，真係會帶比我傷害既話，咁以後可以點？
拾拾：呢Ｄ係以後既事，且而，當愛來臨既一刻，你跟本擋唔到，就算呢一種愛係令你甜蜜滿瀉又或係焦頭爛額
拾拾：每個人都阻止唔到
拾拾：包括你自己
我：妳呢位陌生人講得都無錯
拾拾：（哈哈）
拾拾：希望你可以同到呢個女仔一齊
拾拾：而我都可以搵返最適合我既愛啦
我：姐係妳會同男朋友分手？
拾拾：唔會
拾拾：我仲想試多一陣先



係船上面同拾拾由上船ＭＳＧ到落船，估唔到係海中心都收到Ｄ電話ＷＯ。

落到船後，又呼吸到果Ｄ混濁既空氣，不過，我既心變返唔再混濁。