[愛情無限loop] 就係咁，我做左女神一年既備胎: １８２　我生氣了

聽到七三廿一既說話後，我唔知點解諗起一套戲，一套星爺做既戲，戲入面，有一句對白係咁，「唔通我呢一世都同佢地一樣要做一條溝唔到女既可憐蟲。」然後，星爺就決定學壞。

就好似，而家既七三廿一咁……

放棄做好人，要撤頭徹尾做一個壞人，見到佢咁，我問左佢一句：「你咁做係為左想果個女仔返轉頭？」

七三廿一無出聲，佢點一點頭後，又搖一搖頭。

睇黎，佢都唔知自己想點，而我又問：「咁樣做，真係值得咩？」



佢今次好肯定咁點一點頭，睇黎佢真係好堅定做一個壞男孩。

而我，都無再問佢任何事，只係等佢喊到咁上下，送走左佢，而送走左佢後，我就諗，原來一個人等另一個人，可以等十年，完住付出，但係毫無收鑊。

七三廿一變成咁，係因為佢唔甘心，定係認命呢？

從少，我地會相信，只要對自己鍾意既人無私付出，就可以得到回報，但人愈大，學識左利益得失後，所有野就只會先睇回報，唔睇付出，只求回報既愛情，又係未愛情呢？係自私既表現？但其實，每個人都有自私既一面，就好似七三廿一想阿珍做佢女朋友一樣，自私到，如果阿珍唔答應就唔比阿珍落地，又好似七三廿一鍾意左十年既女仔一樣，自私地將七三廿一留係身邊一直陪佢，但又唔同佢一齊。

就算係我，都會有自私既一面。



沉重既心情，更沉重，返到屋企已經係三、四點，連老牛大人都訓到扯晒鼻鼾，而我，就訓左係床上面，今晚睇黎都唔會訓得著。

今晚唔知係未個天鍾意玩我，第三次響電話，不過，今次唔係阿珍，而係阿琪，我記起，佢而家應該同能蟹一齊飲野。

我接左個電話，不過聽電話既唔係阿琪，而係能蟹。

「喂！牛仔！我同阿琪出左黎飲野啊！」聽把聲Ｄ語氣就知道，能蟹佢飲醉左，而我依希聽到阿琪把聲，以及車既行駛聲。

我無出聲，而能蟹就繼續，「你唔出黎既點解！點解啊！點解啊！點解啊！」我而家真係無心情聽佢講醉話，而且唔知點解，我聽到佢把聲就無名火起。



而係呢個時候，阿琪好似拎返個電話，佢同我講：「佢飲醉左啊，我同佢朋友送緊佢返去……」「妳真心覺得佢係真醉？」呢把係另外一把未聽過既聲，可能就係阿琪口中所講，能蟹既朋友

「我都返緊去架拿，你咁夜都未訓既？」阿琪問我，而我只係好簡單咁答左佢：「就訓。」

「咁你快Ｄ去訓啦，我返到會ＭＳＧ你，我……」阿琪未講完，個電話就好似比能蟹拎左，然後又講一大堆醉話，我按奈唔住自己，爆粗話：「能蟹，你唔撚好惹起我把火，你識我咁撚耐，都知惹起我把火Ｄ人無咩好下場。」

佢一聽到我咁講後，個人靜晒，而我再講多句：「我而家可以話比你聽，阿牛很生氣，後果很嚴重。」然後，我就ＣＵＴ左佢線。

我唔知佢地之後點，我只知道我訓左係床上面一陣後，就聽到好幾聲ＭＳＧ既聲音，我無理到，因為我今晚唔想再掂部電話。