[愛情無限loop] 就係咁，我做左女神一年既備胎: １８１　放棄做好人（補返更新）

咁沉重下訓著，會係點架呢？唔知會唔會發惡夢架呢？

係仲係訓著之際，我又收到個電話……又係邊個嘈住我啊……我一睇，又係阿珍。

「又點啊……」我語氣唔多好咁問佢，但係佢好似無理過，直接話：「你而家快Ｄ到我屋企樓下，七三廿一好煩佢唔肯走啊。」

下！？唔撚係掛，做咩無啦啦發生Ｄ咁既事啊，一聽到阿珍咁講，我就衝左落去，去到阿珍樓下，我見到既，係兩個人坐左係個搖搖板上面，但係阿珍係凌空左，可能係因為七三廿一比佢重既關係。

我行左過去後，就問七三廿一：「你搞咩啊？」



七三廿一見到我後，無出聲，而阿珍就同我講：「不如你幫我落左黎先啦。」

我用力咁將阿珍所坐果邊好大力按下，令阿珍可以落地後就放左手，可能因為放我太突然，七三廿一果邊落黎果下好快，而且佢都被彈左落地。

不過我無理佢，只係問阿珍：「佢做咩事要咁？」

阿珍就好無耐咁話：「佢問我可唔可以做佢女朋友ＷＯ，但係我識左佢咁短時間，都唔知佢係Ｄ點既人，而且我對佢又無感覺，未同佢講無可能囉，點知一講，佢就唔比我落地，要我答應佢先得。」

下……咁樣好無風度下ＷＯ，我望向七三廿一，而佢望到我望佢，刻意回避我既眼神。



「你同佢傾下啦，我眼訓返屋企先拿。」阿珍講完呢句後，就交左呢個爛攤子比我，而我行到七三廿一面前，就問佢：「你點解要咁做啊？」

點知我呢一問，七三廿一竟然喊住同我講：「無女仔會鍾意好男仔架，佢地只會鍾意壞男仔咋，鍾意壞男仔啊！壞男仔啊！！！」

佢好似癲左咁喊，喊得好大聲，我見到佢咁都唔知點做，只可以蹲下，問佢：「發生左Ｄ咩事啊？」

「點解？由細到大，Ｄ人都叫我要對你鍾意既女仔好Ｄ，個女仔先會同你係埋一齊，但係我都照做啦，點解次次佢地只會話我係好人，只係想同我做朋友ＷＯ。」佢一邊喊，一邊叫：「十年啊！我等左佢十年啊！佢呢十年入面我一直陪住佢！甚至佢有男朋友！我都會有一個適當既距離保護佢啊！佢知架！佢知架……佢一直都知道我點解咁樣做……」

佢就好似想將一直屈係心入面既說話，一次過講晒出黎，「十年入面，佢想我接送佢我一定到，佢話Ｄ男朋友欺負佢，我就陪佢散心，有咩野想做唔夠膽自己做既話，我一定陪佢，但點解每次佢分手，係佢旁邊果個一定係我，但係佢無諗過選擇我……」



佢無再喊得咁勁，但係依然流緊眼淚，「點解每次我話想照顧佢一生一世，佢都只會話我係一個好人，點解佢每次被人傷害完一次又一次，都只會返到我身邊療完傷手拍拍羅友就走，佢為以前Ｄ男朋友墜胎，都係我陪佢去，果次係我唯一一次可以拖住佢隻手成日，但係值得開心咩？佢墜胎啊！我拖住佢去犧牲一個生命啊……我唔想見到佢再比人傷害落去，所以我最後同佢表白，得出黎既，就只有好朋友呢三個字……」

佢望住個天，然後好諷刺咁笑，「無人會鍾意好男仔架，Ｄ女仔只會鍾意果Ｄ比佢地傷害既人，傷害佢地令佢地身上有無數既戰績，佢地會見到呢Ｄ戰績而開心架。」

究竟要去到幾絕望，一個人先會放棄自己以前既所想，去學習一個新既思想呢，係呢一刻，我好同情七三廿一，佢對自己鍾意既女仔好係無錯架，只不過佢對左一個唔識得珍惜自己既人好，令到佢害怕以後對人好……咁樣，值得咩？