[愛情無限loop] 就係咁，我做左女神一年既備胎: １８０　沉重的夜（補返更新）

比阿爸睇死追唔到阿琪，激死我，但係點解佢先前教我如果要日久生情，要慢慢黎，但係而家又要咁。

呢件事我都唔想多理，大被過頭訓左佢算，但係當我訓果陣，有電話打入黎，唔通係阿琪？我滿心期待去望個電話，原來果個人係阿珍。

我失望咁接過電話：「喂……」

「唔係阿琪把聲駛唔駛咁既死款啊。」阿珍又會估到既。

「無，我訓緊覺姐，咁夜打黎做咩野？」我問，而阿珍就話：「尋日七三廿一約我去飲野，我都同佢出左黎。」



「咁未幾好……」我無咩意思覆佢。

「但係我見到能蟹約左阿琪出黎飲野ＷＯ，你唔知咩？」阿珍呢一句，即刻打醒左呆下呆下既我，然後，有個ＭＳＧ　ＳＤ左過黎，係一張相，我睇到張相，係阿琪同能蟹一齊飲緊野既相，而旁邊仲有其他人。

我睇完張相後，就問：「佢地兩個係單獨定同其他朋友？」

「好似係同其他朋友。」阿珍話，然後我地ＤＥＡＤ　ＡＩＲ左一陣後，佢又問：「阿琪無話你知？」

唔知點解，呢一刻我唔知點答，以前我點都會好老實咁講我唔知，但今次，我唔想答唔知，但又唔想呃佢話知。



係無答佢既情況下，阿珍就幫我完場：「我唔迫你答，不過只係想你知道一件事，唔係剩係等一個人，果個人就會珍惜架，你見我咁，我等左阿塔咁耐，佢一見到阿琪未又衝左埋去，我唔想你好似我以前咁咋，而且能蟹都算係靚仔一名，阿琪鍾意佢唔係無可能既事。」

一個又一個字打落我個心上面，好痛，唔知點解有一種想喊既感覺，但又喊唔出。

「我……我知架拿……」我無咩心機咁回應佢，而佢好似聽得出我既語氣，就話：「咁你早Ｄ訓啦，唔阻你拿，拜拜。」

收線後，心情更加失落……

唔通，真係好似老牛大人咁講，我做左兵自己都唔知？但係，有幾多個人會做知道自己做左兵先得架，知道果Ｄ人，都係已經唔再做兵既人。



帶住好沉重既心情，訓左係床上面，原來，唔止發生一Ｄ大事會有咁既感覺，呢Ｄ係未做兵既心情呢？

突然，電話響左一下，應該係ＭＳＧ，我望一望電話，係阿琪，係幾張相。

第一張係一班人既背影，我認得出，其中一個係能蟹既背影，而第二張，係一張佢既手既相，好似傷左。

阿琪：同能蟹去左飲野
阿琪：頭先我好論盡
阿琪：整親（喊笑）
我：妳自己小心Ｄ啊
阿琪：嗯（開心）
阿琪：你做緊Ｄ咩啊

唔知點解，我今晚無想再覆阿琪既動力，只係想入返個被窩入面，繼續比呢一種沉重侵襲。