[愛情無限loop] 就係咁，我做左女神一年既備胎: １７０　發問問題機

ＪＵＤＹ呢個懶妹好少出黎跑步，但係有時跑後食飯佢就會到，今日佢一黎到我地跑完步既飯局，見到能蟹身邊多左個人跟出跟入，就問我：「果條友邊個黎架？」

我笑笑口同ＪＵＤＹ講：「能蟹新請既工人。」

「下？咩而家Ｄ工人咁忠誠地跟得咁緊既，我見頭先能蟹入廁所，個工人都入埋去ＷＯ。」ＪＵＤＹ話。

「幫佢逗住嘛。」我忍唔住笑大笑左出黎。

而阿琪都笑左好耐，然後先話返個真相比ＪＵＤＹ聽，ＪＵＤＹ一聽完後，就Ｏ晒咀望住我地，「唔係掛，點會有人咁直接叫人教架，而且係搵能蟹ＷＯ。」



「搵能蟹呢樣唔奇，最奇既係佢做得出呢種行為。」我話，然後阿琪點頭認同。

「世界真係無奇不有。」ＪＵＤＹ呢一句講完後，能蟹同七三廿一就返左黎，而七三廿一見到ＪＵＤＹ，就好積極咁介紹自己，「你好啊，我叫七三廿一啊，今日第一日黎跑步，以後請多多指教，係呢，點解頭先唔見妳跑既？但係妳又黎食飯既？妳……」

「等等，我同你唔係咁熟，你唔好問咁多野，ＯＫ？」ＪＵＤＹ一野就ＫＯ左七三廿一。

而七三廿一被ＫＯ後，就成個人呆左咁坐左係度，望一望能蟹，然後問：「師傅啊，如果呢Ｄ情況下，我應該點處理啊。」

係呢一刻，我飲緊既湯噴左出黎，笑到噴左出黎，不過我已經好快咁遮住個口，先唔駛噴到四圍都係，阿琪見到我咁，就比左張紙巾我，不過佢都係笑住比我，ＪＵＤＹ就反晒白眼無眼睇，剩返既能蟹，就乾笑左幾聲後答佢：「做人呢，就最緊要知幾時應該講野，幾時應該收聲。」



「咁而家呢？」七三廿一仲問我出口……我地笑到肚痛拿。

能蟹一副被打敗既樣子，搭住左七三廿一既膀頭，然後同佢講：「而家，唔該你，收聲。」

「知道。」七三廿一即刻收聲，終於可以靜下，「係呢，點解要收聲既？」佢仲問，媽啊，可唔可以比我安心地食埋個飯佢。

今日餐飯我地全程忍笑地食完，食完飯，七三廿一就繼續不停炮轟ＪＵＤＹ問佢問題，真到ＪＵＤＹ話佢有男朋友，七三廿一先停止唔問佢。

識左七三廿一唔耐，我已經覺得佢係一個發問問題機，但係佢只會對異性發問，但我更加意會到，原來只該名要異性已經名花有主，七三廿一就唔會再煩佢，因為佢見ＪＵＤＹ已經唔係佢目標，所以轉向其他人。



不過有一點我好奇怪，點解佢唔問阿琪既，而我心中呢個問題，比其中一位狗公問左：「七三廿一，點解你唔問阿琪問題既？」

七三廿一望一望阿琪，然後望一望我後就話：「佢地兩個一齊既，所以唔問啦。」

下！？我聽到七三廿一咁講呆左，而阿琪聽到佢咁講就係度笑，無錯，我係想同阿琪一齊，但而家未係ＷＯ。

而當大家講左比七三廿一知我無同阿琪一齊之後，七三廿一好似唔信咁話：「唔係ＷＯ，佢地好似拍緊拖既情侶ＷＯ。」

我都希望可以成你貴言，但唔係，所以我答七三廿一，「我同阿琪唔係一齊架。」

「所以……」睇黎七三廿一好似想蠢蠢欲動問阿琪問題，但係阿琪已經好快咁話：「你唔駛問我，我係唔會答你，而且我對你無興趣。」好少何見阿琪咁直接答一個人。

七三廿一見到咁，就唯有繼續問頭先有應佢既果Ｄ人。

但係點解，佢咁想做男神呢，呢個真係一個迷，等有機會問一問佢先得。