[愛情無限loop] 就係咁，我做左女神一年既備胎: １６９　七三廿一

「你可唔可以再清楚Ｄ講多次？」能蟹Ｏ晒咀咁問。

「你好，我叫七三廿一，你可唔可以教我點樣先做到一個男神啊？」七三廿一講多左次。

「你叫我教你Ｄ咩野話？」能蟹又問多次。

「教我做男神。」七三廿一好認真咁講。

「你想邊個教我做男神話？」能蟹你問左第三次拿。



而七三廿一仍然好認真咁講：「你。」

能蟹望住七三廿一，然後望一望佢身後既我同阿琪，就話：「你係度等一等先。」然後佢慢慢行左過黎，同我地講：「頭先佢講既野，你地都聽到？」

我同阿琪聽到後，就點一點頭。

「無聽錯？佢叫我教佢點樣做男神ＷＯ？」我地又對能蟹點一點頭。

然後，佢地拉左我地兩個埋一邊，好細聲咁話：「你估佢會唔會係傻架？」



聽到能蟹咁問後，我同阿琪回頭望一望七三廿一，然後我答：「睇落又唔似ＷＯ。」「係囉，唔似ＷＯ。」阿琪答。

「我而家好撚驚啊，我都未試過有人無啦啦行過黎叫我教佢做男神。」能蟹話，而我就答佢：「我明白，因為正常人都唔會預到呢Ｄ情況，所以你驚係正常既反應。」

「咁……咁我而家點好啊……」能蟹好無助咁話。

「可以點啊，你唔想教未ＳＡＹ　ＮＯ囉。」阿琪話，而能蟹聽到後，就行到七三廿一面前話：「唔可以。」

呢一句「唔可以」一講左出口後，七三廿一竟然攬住左能蟹隻腳，不停話：「唔可以啊！如果你唔教我！我就攬住你唔放！」我地完全無諗過七三廿一想能蟹教佢做男神既決心大到咁，不過見到佢地兩個咁，唔知點解，我同阿琪都好想笑出黎……唔係，係已經笑左出黎。



能蟹見到咁當然係勢整甩七三廿一啦，但係估唔到七三廿一又咁勁，點甩都甩唔到，而慢慢地佢地既行為，吸引左Ｄ跑步既人駐足欣賞緊，能蟹見到Ｄ人愈黎愈多，唯有話：「我教你拿，你放手好唔好。」

「唔信！你係想我放開你先咁講姐！」呢個七三廿一又蠢唔晒ＷＯ。

「咁你想點啊？」能蟹好無奈咁話。

而七三廿一呢個時候就拎左部電話出黎，鏡頭對住左能蟹，然後話：「有片有真相，你而家講你答認教我做男神。」

能蟹心不甘情不願地話：「我答應教你做男神。」

「教邊個我啊，都無名。」我同阿琪聽到七三廿一講呢句後，笑得好大聲，而能蟹就激到面都紅晒話：「我會教七三廿一做男神。」

「你係邊個啊，都無名。」我周阿琪比頭先笑得仲大聲，而能蟹好似比佢激到一個點，自暴自棄好大聲咁話：「我能應會教七三廿一做男神！！！」呢一句已經係叫出黎。

七三廿一聽到佢講左後，就放開手然後好開心咁話：「等我將條片放上網等你唔可以反口先。」



「哈哈哈哈哈哈哈哈哈哈……」唔得，真係好好笑，我同阿琪笑到肚痛，而能蟹當然係呆晒望住七三廿一將條片放上網。

其他人見無咩野睇後，就散開左，而七三廿一就面向能蟹話：「我以後會好努力學做男神架拿，師傅。」

就係咁，能蟹佢從此就多左個得意弟子。