[愛情無限loop] 就係咁，我做左女神一年既備胎: １６６　睡火山長眠

起哄左多一陣次後，Ｄ人就散開，而能蟹就話要去換衫，阿琪就捉住左我問：「你會唔會介意我頭先我擺你係第一位啊？」

我聽到後，搖一搖頭答佢：「唔介意啊，而且呢Ｄ根本唔可以拎黎排位置既，可能今日我係第一，但聽一變最尾都唔定呢。」

阿琪聽到後，微笑左一下同我講：「其實我想放你係第一架，但係見能蟹咁細佬仔，未放佢先囉，不過如果比起重要性既話，你一定係重要Ｄ，不過，你同能蟹唔同。」

「我同能蟹唔同？」我問佢。

「你成熟過佢咁多，可以處理咁多野，所以你有事既話，只要你講自己搞得店，我一定好放心同相信你一定搞身得店，但係能蟹佢呢個人講野多過做野，係一個令人擔心既人。」聽到阿琪咁講後，我表示認同，「係，個死仔係有好多野要執手尾。」



我講完後，又問：「妳頭先有無見到阿富既表情？」

「有啊……」阿琪好似有Ｄ欲言又止咁，但最後都講左出黎，「佢頭先叫我去後面，佢有Ｄ野同我傾，但係我好驚，你可唔可以陪我去？」

「可以係可以，但係佢講到好似剩係想同妳傾，如果我在場的話，阿富唔會講Ｄ咩野架ＷＯ。」我答。

「咁又係，咁你可唔可以匿埋啊？如果佢對我做Ｄ咩野既時候，你可以幫我。」阿琪既擔心都情有可願，所以我答應左佢。

我搵左一個阿富見唔到既地方睇住佢地，而且可以聽到佢地講Ｄ咩。



阿琪而家企左係阿富面前，問佢：「咩野事？」

而阿富就好似好唔忿氣咁，「頭先做咩唔放我係第一位啊！」佢用既係質問既語氣。

「佢地玩下姐，你駛唔駛咁緊張啊。」阿琪答佢，而阿富好似仲嬲咁話：「咩野遊戲啊，我而家係妳男朋友啊，妳點可以唔放我係第一位啊。」

下！？原來阿富而家係阿琪男朋友咩！？點解我無聽阿琪講過既。

「等等，阿富，我無答應過你做你女朋友，所以你唔係我男朋友。」阿琪答返阿富，好彩，原來阿琪唔係阿富既女朋友。



阿富聽到阿琪咁講後，好燥底咁話：「唔怪得就算同妳表白完，妳都好似對我唔瞅唔彩咁啦，我自問有咩對妳唔好啊，點解妳要唔接受我既愛！點解妳要咁對我啊！」

「阿富啊……有Ｄ野係唔可以迫架，我剩係想我地係朋友關係。」阿琪今次好直接咁回答阿富。

「唔得！我同妳一係就做情侶！如果唔係就朋友都無得做！」阿富既堅決，令到阿琪都開始嬲嬲地。

「一直以來妳知說我對妳係有意思架啦！點解妳仲要陪我出去食飯！點解妳仲要陪我見我Ｄ朋友！點解妳仲要聽我電話ＷＯ！」阿富一口氣咁講左好多既野，但比阿琪一句反駛後就無再出聲，「因為係你迫我咁做架！！！」

我未見過阿琪咁嬲，「係你不停咁打電話比我打到通為止，係你不停叫我陪你叫都我肯為止架，所有事你都要迫我遵循你意思去做，你叫我點會肯做你女朋友啊？」阿琪既反問，令阿富無野反駁。

「我有話過我唔會同你係一齊，但係你話唔得，話比一個月時間大家，但而家一個月都未到我已經覺得好辛苦，仲要係我未同你開始已經覺得辛苦，咁我仲點會同你一齊啊。」阿琪講到面都紅晒。

「咁姐係……」「我地係唔會有可能架！」阿琪呢一句係叫出黎，就好似將咁耐忍住既怒氣一次過發放出黎。

然後，阿富呆滯望住阿琪，望住果個比佢激到喊既阿琪。



然後，阿琪擦一擦眼淚，係阿富既身邊擦過，向我既方向行緊過黎。

佢地既一齊，就係阿琪呢一句叫喊下結束，睡火山今次可能要長眠。