[愛情無限loop] 就係咁，我做左女神一年既備胎: １６５　阿琪著緊龍虎榜

「我地係唔會有可能架！」望住眼前激到喊既阿琪，以及比阿琪嚇到呆左既阿富，而我都呆左咁望住佢地。

究竟發生左Ｄ咩野事會搞成咁呢，時間，回到一個小時前。

今日，係跑ＧＲＯＵＰ舉行例會既一日，會有好多人出黎跑步，而今日比較特別既係，因為阿琪剛剛生完日，好多人仲想繼續送禮，但係都比阿琪婉拒晒，不過，有一個人點被婉拒都好堅持。

果個人，就係阿富。

阿富呢一排只要有阿琪出現既跑步活動，都會幫阿琪霸一個ＬＯＣＫＥＲ，而今日都唔例外，而且，佢今日準備左好多野比阿琪，有好食既野，有解渴既野，以及仲有一份小禮物。



我陪阿琪去放野果陣，見到個ＬＯＣＫＥＲ入面有一個紅色既小盒，就好似裝戒子果Ｄ紅色小盒。

放完野後，我同阿琪話：「我見到入面有個盒仔，可能係阿富想送比妳。」

阿琪聽到我咁講後，就話：「最好唔好啦，因為果個盒好似阿富之前想同佢前度求婚用既戒子。」

「下？唔係掛……」我聽到阿琪既說話後，第一時間既反應係咁。

「所以我未話千祈唔好送比我，如果佢真係送比我，我一定拒絕，佢已經唔係第一次話要送呢隻戒子比我。」阿琪講講下嘆一嘆氣，「係未已經係時候直接同阿富講呢？」



「一早就應該講啦。」我話。

「跑完步先再諗。」阿琪講完後就跑出去運動場。

跑左一陣，人都慢慢多，個死仔能蟹而家先出現。

「你地咁早啊。」能蟹一到場就同我地兩個講。

「係你遲姐。」阿琪話。



「咁阿媽妳係未又要話我先。」睇黎佢地兩個都已經好受樂地玩呢個母子遊戲。

又跑多左陣，我地諗住休息，而遠睇見到一大班人係度傾緊Ｄ野，我地三個就行左過去問：「傾Ｄ咩野傾到咁開心啊。」

有個狗公就好直接話：「無，我地係度講緊阿琪心目中既著緊龍虎榜姐。」

「下？我既龍虎榜？」阿琪一聽到就問，而我就話：「你地都好無聊下ＷＯ，咁都有龍虎榜。」

而在場既人聽到我咁講後，就話：「牛兄，你唔好咁講住，你都係呢個龍虎榜上面，而且係好高既位置。」

「下？」呢次到我下左一聲，而能蟹佢就話：「講黎聽下啦。」

Ｄ狗公聽到能蟹咁問，就話：「拿，排名又最低開始，係……」佢地一個一個咁講，人愈黎愈多，連阿富都行左過黎，而阿琪一路聽一路係度笑，又時就反駁一下，當講到，「第三名應該就係阿富。」講完之後所有人都起哄，而阿富聽到自己第三名，就話：「我呢Ｄ人點會係第三名ＷＯ。」

阿琪聽到阿富咁講後，就話：「係啊，佢點會係第三名。」



全場尷尬左一下，而我見咁就為左打圓場所以問：「咁第二同第一呢？」

「我地都諗左好耐，究竟邊個係第一呢，係阿牛定係能蟹呢，我地都諗左好耐。」佢地繼續起哄，而阿琪就笑我好開心咁話：「唔比雙冠軍既。」

「唔得！」能蟹一聽到阿琪咁講後，就話：「我要拎第一，唔要雙冠軍。」

估唔到能蟹佢會咁小朋友脾氣，但係原來有時小朋友脾氣，係有用，「好啦，比第一你啦，阿牛你就讓下佢啦。」

「ＯＫ，我無所謂啊。」我係無所謂，點解個心有Ｄ不是味兒既感覺，而在場既，有個人比我更不是味兒，果個人，就係阿富。