[愛情無限loop] 就係咁，我做左女神一年既備胎: １６３　歡笑背後

我訓左係床上面，腦海仲記得頭先阿琪既說話，以及阿琪既表情。

我地係公園度，傾左好多野，今晚，令到我更加明白阿琪，我記我阿琪一開始講佢既野果陣，係用一個好平靜既語氣。

「阿牛，我平時已經講左好多我既野你知，你覺得，我係個點既人？」佢係用一個問題而開始。

而佢咁樣一問，我諗左諗後好認真咁答佢：「妳係一個好值得人地照顧既女仔。」

「真係咁？」阿琪反問返我，「點解我係一個值得照顧既人？」



「因為……」唔知點解咁樣比佢問既，口窒窒添。

佢無等我答佢，就講：「以前，有好多個男仔都話會照顧我，但係佢地到最後，都係最傷害我既人，我份人好易信人，每次遇到一個真心對我既人，我都會提醒自己，叫自己睇清楚先，不過每當我決定去選擇信一個人既時候，都會比我發現果個人原來背後呃緊我。」

佢依然用好平淡既語氣同我講：「我上一次選擇信既人，令到我要變賣好多野還債，而家一要打官司，我屋企要我養，我無助既時候，係有好多人幫我，但係果Ｄ人個個都係想我做佢女朋友，我唔接受的話，我就養唔到家，我接受既話，又對唔住果Ｄ幫我既人，所以我只可以靠自己，迫不得已既時候先搵果Ｄ人幫我，不過我好明白一件事，佢地幫我幾多，我始終有一日係要還。」

聽到佢咁講後，我先知道原來阿琪背後仲有呢Ｄ野要煩，「咁……我有咩可以幫到妳架？」我問佢，而佢望住我同我講：「你知唔知道，我最想既唔係你幫我。」

「點解呢？」我又問。



「我唔想你都變成果Ｄ人咁啊，我唔想最後係要為左報答你既幫忙先同你一齊啊。」阿琪好認真咁同我講：「我想我係真心去愛一個人先同佢一齊，而唔係佢願意花幾多錢係我身上，又或者幫左我幾多，我先同果個人一齊，你知唔知道咁樣既愛，係會有幾大既壓力……」阿琪講講下喊左出黎，而我見到佢咁，就行上前攬住左佢。

「我好辛苦啊……究竟Ｄ煩事幾時先會完，我幾時先可以安安定定咁過生活啊……」阿琪，佢係打從心底咁喊出黎。

我無出過聲，因為我知道阿琪而家需要既，唔係花言巧語，亦唔係一個承諾，而係一個可以安靜係佢身邊陪住佢既人。

佢繼續喊，亦都繼續講，「所以我唔想係呢個時候拍拖，我有好多野煩，我唔想害到其他人，更加唔想害到你，你知唔知啊……」

我望住淚眼梨花既阿琪，講出我心底既話：「我無諗過妳會害我，亦都無迫妳同我係埋一齊，妳要我等，我可以等，雖然我唔知我可以等幾耐，但我知道我可以係呢段時間陪住妳，所以，妳可以決定自己一個人去面對問題，可以選擇去搵其他人去幫妳，但希望妳會選擇如果要喊既話，只搵我一個人，因為我一定有方法令到妳笑返。」



「真係？」阿琪問我。

「嗯。」我點一點頭：「我有幾時呃過妳，我只希望，妳選擇我陪妳渡過人生中其中一次既低潮，咁樣已經好足夠。」

阿琪點一點頭，然後我，打左佢一下，佢不解地望住我，然後我話：「妳生日喊，所以抵打。」

「但人地生人，你竟然打人。」阿琪笑左笑話。

「妳有樣野唔記得做。」我同佢講，而佢又用一個不解既眼神望住我，「妳唔記得許願。」

「年年我都有許願，但係次次都無實現到。」阿琪扁咀咁講。

「今年唔同，妳許既願一定會實現。」我話。

「點解你會咁肯定？」阿琪問。



「因為……有我。」我講完後，就捉緊阿琪既雙手，「乖，許願。」

「嗯。」阿琪點左下頭後，閉上眼許左個願，而我，就錫左阿琪既額頭一下，輕聲說：「我收到妳既願望。」

係床上面，我仍然記我阿琪所講既野，原來係阿琪歡笑既背後，有咁多野要處理，佢所經歷過既事，比我呢個年紀要去經歷既仲要多。

如果，可以幫輕到佢就好，但係，我邊有咁既能力去幫佢。

我能做到既，就好似我所講既一樣，只可以係佢身邊默默咁陪住佢，做一個情緒既垃圾桶，呢個，係我最可以做到既野。

但係咁做，真係值得咩？我唔敢諗，因為，我怕我會有放棄既念頭。