[愛情無限loop] 就係咁，我做左女神一年既備胎: １６１ 蛋糕上既花名
係我眼前既阿琪，好唔同，今日佢真係好唔同……
佢……好靚……
佢平時都好靚，但係今日既佢，真係好靚……
「喂，做咩眼金金咁望住人啊？」究竟係邊個講緊野呢，呢一刻我真係咩野都聽唔入耳。
平時見到既阿琪，一係就係同佢跑步既運動ＬＯＯＫ，一係就係同佢行街既街坊ＬＯＯＫ，又或左係買菜食野既休閒ＬＯＯＫ。
而今日既阿琪，佢化左個淡妝，眼影令佢對鳳眼更靚，兩邊臉頰既腮紅，再加上佢搽左好水潤既唇蜜，點解？點解佢可以令上天比佢既美麗容貌再提昇到另一個更高既層次。
我望到入晒神，要佢打我一下我先會意到我既失禮。
「企係度咁樣望住人地，我會怕羞架……」佢講完後問我：「係未唔好睇啊？」「更係好睇啦！」太過亢奮講野大聲左添，阿琪聽到我咁講後笑左出黎話：「呢個係用上次你送比我既化妝品架，係未好靚啊？」
佢問完後我不停咁點頭，然後佢好開心咁話：「多謝你既生日禮物，所以我今日特登化比你睇架。」
真架？唔知點解我聽到佢講呢句，好開心，有Ｄ飄飄然添。
「我地企係度好耐拿，幾時上去架？」阿琪問我，「係……係ＷＯ，快Ｄ入黎先。」阿琪步入升降機，無企係我旁邊，反而係企係我前面好近既位置，不過佢係用背隻對住我。
咦……佢仲搽左香水ＷＯ……「妳搽左香水？」
阿琪聽到我咁問後，就答：「係啊，你平時話人地有陣洗頭水味，所以今日未噴香水出黎囉，算比足面你啦，今日特登化妝，仲噴嘛香水添啊。」阿琪既笑配上佢今日既腮紅，更加可愛。
好快就上到去，我帶佢行到門口前，就同佢講：「閉上雙眼先。」
「下，咁神秘，好啦……」見到佢閉上雙眼後，我就開左門，「可以張開眼拿。」
佢望左眼前我為佢準備既野，露出左一個既開心又驚訝既表情，「好靚啊，你點搵到Ｄ咁既地方既。」
等我左細心講下而家既現場，係暗黃既燈光下，訂返黎既水晶汽球令到個場更夢幻，水晶汽球內仲有粉色既小汽球，形成好似一朵花咁係半空中浮緊，呢朵半空中浮緊既花，我場內放置左幾朵。
我帶住阿琪入到個廚動，間廚房其實好大下，可以裝到１２到１６個人都得，而且有個廳仔比一大班人玩，而我，就係廳上面既既牆度，用英文字波波砌左堆字，果堆字係，「ＨＡＰＰＹ ＢＩＲＴＨＤＡＹ ＡＫＩ！！」，係啊，仲有兩個大感嘆號。
而另一邊係個開放式廚房，呢個開放式廚房係用一個高臺隔住，而呢個高臺，就係一陣我同阿琪食野既地方，我仲特別準備左Ｄ柔和既音樂，等現場無咁悶。
阿琪望住呢個地方，對眼閃閃發光咁，「呢個地方好正啊。」聽到佢咁講，我個人都定Ｄ，「知妳鐘意食野，同鐘意煮野食，所以特登搵呢個地方架，鐘唔鐘意啊？」
「好鐘意啊。」阿琪微笑咁望住我講。
「鐘意就得啦，咁今日既主角，請上座。」我帶阿琪去到佢今日既座位上面，拎出左我整左既沙律同湯，「妳品嚐頭盤先，主菜仲整緊。」阿琪聽到我咁講後笑左出黎，望一望我整既頭盤，然後話：「又真係有板有眼ＷＯ。」
「當然，呢Ｄ係天份。」我笑住話。
「那來的自信。」阿琪笑住話：「但我想你一齊坐低食ＷＯ。」
「……但仲有Ｄ野食未煮好。」我答。
「咁我都幫手啦。」阿琪講完後就行左過黎，而我見到佢咁講，就話：「下？今日幫妳慶祝生日，就係想妳唔駛忙坐定定等食。」
「但我見到個廚房咁靚，我唔落手煮野食未好浪費。」阿琪而家行到去雪櫃前打開，「有蛋啊，可以整Ｄ蛋料理，咦？有支白酒既？你帶黎架？」
「係啊，妳幫我拎出黎放入個冰桶入面。」我回答佢。
「好，放左……有意粉ＷＯ，我整Ｄ意份一陣一齊食。」「好啊。」
「你煲定水比我啊。」「頭先妳話想食意粉果陣，已經煲左拿。」
「個煎蛋餅好靚啊，你睇下。」「係ＷＯ，我Ｄ魚都煎好拿，妳睇下。」「好香啊。」
係呢一刻，係呢個廚房入面，總覺得我同阿琪好似一對新婚夫婦一樣，一齊整野食，四圍既氛圍係我同阿琪既歡笑聲下，染成粉紅色。
我地兩個最後七手八腳咁整多左好幾樣野出黎，放左係高臺上面，係一個豐盛既大餐。
係高臺上面，阿琪既電話從頭先開始就停係度震，佢拎起左部電話望一望，「邊個黎啊？」我問佢，而佢就答我：「阿富囉，佢知你今日同我慶祝生日，所以由中午已經一直煩我，我無理過佢……」佢望一望果臺豐盛既晚餐，賊笑左一下，「我做Ｄ野等佢收聲先。」
佢用電話影左一張相，張相係豐盛既晚餐，然後，佢ＳＤ左比阿富，仲打左個ＭＳＧ：我同阿牛開餐，佢煮野我食好開心
然後，阿琪就真係無再收到阿富既ＭＳＧ。
「好，我地可以開心咁食野ＬＵ。」阿琪坐返個位，而我就開左支白酒，倒入我同佢既酒杯度，我倆拎起酒杯，對望左一下後，碰杯，「生日快樂。」我同佢講，「多謝，我真係好開心。」佢答我。
我地就係一個好歡欣既情況下享用晚餐，其間有講有笑，我喂下佢，佢喂下我咁，我好想，以後同佢都好似今日咁。
所以，我鼓起勇氣又問多佢一次，「阿琪，其實妳有無諗過同我係埋一齊？」
阿琪聽到我咁講後，微笑左一下後答我：「有，甚至，我同我媽媽都提起過。」
「妳媽媽！？」我真係無諗過佢會講比佢媽媽知，「妳媽媽知道有我呢個人存在！？」
「係啊，好早就知，佢仲叫我話你對我咁好，唔好辜負你添。」佢突然笑得好開心咁話，而我就一時後應唔到，呆左咁望住佢問：「咁……姐係……」
「但係……阿牛，我而家無心情拍拖住，因為我身邊而家有好多野要處理，所以想處理完先再諗拍拖既野，不過，我對你有好感既事係真，而且，我同你有時做既野都好似情侶架，只不過無成日做咁解姐。」阿琪講完後，我都明白佢今次既答案，姐係……
「我再等下啦咁。」我微笑答佢。
「咁你再等下啦。」阿琪笑我好開心咁話。
「但妳可唔可以話比我知，有咩事要處理，雖然我唔知可唔可以幫到妳，但我想陪係妳身邊支持妳。」我好認真咁同佢講。
「你真係想知？」佢問我，而我點一點頭。
「慶祝完生日後，再話你知，我想開開心心同你過呢一個生日。」阿琪講完後笑左一笑，呢一笑，耐人尋味。
而我，就點一點頭，「好。」跟住行左去個雪櫃，拎左個蛋糕出黎，阿琪見到個蛋糕後，先係好開心咁笑左一笑，然後就扮嬲話：「點解你要係上面寫『師奶仔』啊？」
我見到佢咁既反應，預料之內，「因為呢個花名係我幫妳起，然後個個人都咁叫妳。」
「你仲好講，叫到我老晒。」佢繼續扮嬲。
「但係妳每次聽到人地咁叫妳，妳都會好開心，所以呢一扮開心係我送比妳架。」我話，然後佢就同我講：「阿牛，好多謝你，遇到你真係好。」