[愛情無限loop] 就係咁，我做左女神一年既備胎: １６０　期待已久的生日會

「配料……切好……」我望住眼前一大堆既食材，逐樣逐樣點數。

「調味料……都齊……」翻一翻個袋，再三確認多次。

「仲有隻雞……有……」預先一日準備好既雞，Ｄ香料既味已經入晒隻雞到。

然後，我將所有食材逐一咁放入個車仔籃度……「仲有支白酒！」尋日同阿琪行街買果支酒，拎左出黎先唔係一陣唔記我帶。

無錯，我咁小心點齊野，因為一陣間就要同阿琪慶祝生日，有少少緊張，又有少少興奮，話晒我係第一次咁大陣象煮野食比女人食，我前女友都只係食過我整既公仔面。



「好，出門。」我拎住架車仔出門，一陣間仲要去拎生日蛋糕，我特登訂左個鬆弛熊生日蛋糕，因為佢好鐘意鬆弛熊，我仲叫個整餅師父係個蛋糕上面寫左一個我幫佢起既花名。

點解要寫花名，唔係寫Ｄ好親匿既名？好簡單，因為我仲人係佢男朋友，呢Ｄ野，等做左佢男朋友先搞啦。

所有野都準備好晒，真係要出門之際，老牛大人出現了……

「嘩！阿仔，你準備咁多野去邊啊，上山同女打野戰啊？」老牛大人思想其實比我仲前衛，我望住佢，只係笑左笑同佢講：「無，我報左烹飪班而家去學煮野食姐。」

「煮野食都好學既，學下點樣傳宗接代仲好啦……唔通烹飪班有條女好靚，所以你先去上堂？」我真係服左老牛大人。



我拎住架車去左地鐵站，坐車去觀塘，因為果間出租廚房係觀塘。（大家有興趣知就留言問啦）

坐緊車果陣，收到一個電話，原來係送佈置汽球黎既人。

「喂……係啊，一陣準時見啦，我就到果邊，係果邊等你，你架車到左就話我知啦。」收左線後，我收到阿琪既ＭＳＧ。

阿琪：好開心啊
我：傻豬
我：咩事咁開心
阿琪：一陣你同我慶祝生日囉


我：（喊笑）
阿琪：一陣食完野女以去飲野啊
我：都可以啊
阿琪：不如叫埋能蟹同ＪＵＤＹ？
我：可以啊
我：等我地兩個慶祝完之後就搵佢地
阿琪：好（開心）
阿琪：開心（開心）

見到阿琪咁期待，我唔單止無緊張，相反竟然更有動力去做呢件事，可能當你真真正正愛一個人既話，就會咁做。

去到現場，租廚房比我既人一早準備晒交場比我，仲問我：「點啊？睇你有成車食材，準備得幾好ＷＯ，希望你今次成功抱我美人歸啦。」因為我呢段時間都有問佢煮野食方面同現場環境既野，所以有時都會傾開我想要個場地做Ｄ咩。

「知道，我會加油。」我人佢講。



「巨蟹座既女仔要慢慢黎唔可以急架。」因為阿琪生日既月份係巨蟹座，所以老闆娘應該估到。

「妳又知巨蟹座既女仔要慢慢黎？」我問佢。

「因為我都係巨蟹座囉，而且都就快生日。」老闆娘答。

「生日快樂。」我同老闆娘講，老闆娘好開心咁笑住話：「記住慢慢黎唔好咁快，最多錫下好拿，唔好咁心急啊。」

聽它老闆娘咁講後，我有少少尷尬答佢：「點會錫呢，未有咁快啦。」

「可能過埋今日就會有呢。」希望可以同老闆娘所講咁啦。

放好晒Ｄ食材，放左支酒同蛋糕入雪櫃，然後睇下現場Ｄ設施，都好齊全，接落黎電話又響起，係送汽球黎既人，落左去拎左兩大袋汽球上黎，就即刻開始佈置。爭分奪秒，好快手已經ＳＥＴ好個場。

而呢個時候，就收到阿琪既ＭＳＧ。



阿琪：駛唔駛比多Ｄ時間你啊（喊笑）
我：緊係唔駛
我：就準備好添啊
阿琪：咁勁
阿琪：我出門拿
我：知道
阿琪：地址呢
阿琪：你仲未比個地址我啊

我ＳＤ左個地址比阿琪後，就同佢講。

我：妳到附近話我知
我：我帶妳上去
阿琪：好（喊笑）



佈置完畢後，就返到去準備焗雞，因為只要放入去個焗爐就得，而且我係佈置果陣已經預先整熱個爐，所以放左隻雞入去後就可以整其他野。

我先整個沙律杯，將預先已經切好既牛油果粒，再切左Ｄ西芹，蘋果，士多啤梨仲有大蝦粒加沙律醬整勻，放入老闆娘預先幫我準備既鐵杯入面，再係上面放上原隻大蝦，頭盤牛油果大蝦沙律杯完成。

然後就到薯仔濃湯，先將烚好左既薯仔拎出黎切粒後放入攪拌機，然後煲熱雞湯再倒入攪拌機入面，打勻，其間不時放入忌廉奶，打勻後倒入打碗，放胡椒粉調味，然後係上面落少少香草扮下野，又完成。

隻雞而家應該差唔多，「叮！」呢一叮打破左呢度既寧靜，我打開焗爐拎隻雞出黎，好香，不過只係完成左一半，因為仲要落蜜糖再焗，拎左出黎將蜜糖搽勻隻雞既全身，好，可以再焗。

就係係呢個時候，阿琪打電話黎，「我到拿。」

「妳等等，我而家落殷接妳。」時間剛剛好，雖然仲有魚未煎，但係我想阿琪見到我為佢煮野既樣，所以一早都預左佢黎到我先煎魚佢食。

係而家呢一刻，我先感覺到緊張，唔知一陣見到阿琪要講Ｄ咩呢？唔知阿琪今日係咩打扮呢？唔知阿琪一陣見到我為佢準備既野會唔會好感動呢？



係呢一程升降機既時間，呢Ｄ問題不停係我腦入面出現，真到，升降機門開啟，阿琪慢慢出現係我眼前……