[愛情無限loop] 就係咁，我做左女神一年既備胎: １５９　我真係守唔到驚喜……

我仲係有少少罪惡咁住係阿琪前面，而阿琪就不時有一個扮嬲既樣望住我，整到我都唔敢出聲，直到阿琪話：「你唔好以為之後唔駛同我慶祝生日啊。」

「我緊係無咁諗過啦……」我即刻答佢：「但係果日約妳去揀酒，唔知……」

「我緊係去啦，我會飲落肚架ＷＯ。」阿琪打一打我既頭後又話：「仲有啊，你果日煮既野要食得落肚先得啊。」

「一定啦，我試左好幾次……等等！！！點解妳又會知我煮野妳食既！？」我真係好驚訝點解佢會知。

而阿琪見到我咁既反應，笑得好大聲咁話：「本來我都係估估下‵架咋，但係頭先你自己爆響口，而家我就好肯定拿。」



真係被阿琪打敗了，「但點解妳又會估到既，我已經做我好唔明顯。」

阿琪又笑左笑話：「你話帶我食野既地方係ＯＰＥＮＲＩＣＥ搵唔到，我果陣已經估你會親自煮我食，然後你呢排有時會問我煮野食Ｄ野，我就更加會估係未真係煮我食，然後你仲叫我陪你揀酒，估你煮野食既機率去到八成，到你自己爆響口，十成十係啦。」

望住笑得好開心既阿琪，心中有一個感覺，其實鐘意既人咁醒都唔係一個好事。

「仲諗住比個驚喜妳添，而家妳知道左……」我既行動力唔知點解好似得返一半。

阿琪聽到我咁講後，微笑咁話：「其實頭先知道你會生日煮野我食果陣，我又驚喜又開心架，因為好少人會煮野我食，而且同我一齊既男朋友，都只係有一個會咁做，所以知道你煮野我食我真係好開心。」阿琪講講下，突然指住我話：「但你今次唔可以好似尋晚咁借醉行兇架。」



「我緊係唔會啦。」我即刻答佢。

「要乖乖唔準百厭。」佢又話。

「我幾時有百厭過……」我答。

「你話呢。」阿琪又扮嬲話，但係佢自己最後都忍唔住笑左出黎。

而我，都跟住佢笑左出黎，好彩同阿琪慶祝既事，無比尋晚發生既事影響到。



但係，我有另一樣野擔心緊，就係座睡火山仍然爆發緊，我諗到阿琪生日前都阻止唔到Ｄ咩野，不過可以肯定既係，呢次睡火山爆發，最後影響到既人一定唔會係阿琪，而係睡火山本人。