[愛情無限loop] 就係咁，我做左女神一年既備胎: １５６　模糊的一吻

「係啊，今個星期六我可唔可以早少少去到果度準備Ｄ野啊？」我拎住部電話，問緊一個人。

「可以啊，你準備成點啊？」果個人問我。

「大既都準備好。」我答佢。

「咁祝你果日順順利利啦。」果個人話。

剛剛同我傾電話既人，係我早前打去ＢＯＯＫ場既人，ＢＯＯＫ咩野場？仲記唔記得我要同阿琪慶祝生日呢，我諗住比個特別Ｄ既生日比佢，所以無諗住ＢＯＯＫ餐廳同佢食飯，咁樣實在太簡單，所以，我上網搵左好耐，最後比我搵到一間係觀塘既出租廚房。



無錯，我諗住租個廚房煮野食比阿琪食。

而且我仲已經訂左Ｄ汽球，裝飾下果日既環境，所以打左去問可唔可以早Ｄ過去ＳＥＴ場。

另外蛋糕一早就訂左，我對自己煮野食既能力其實無咩信心，但係如果講焗果一方面，我就完住無問題，不過整蛋糕對我黎講係好難既事，而且我時不時食阿琪親手整既野食同甜品，所以決定買現成既。

餐單已經一早訂左，就同我同先所講既一樣，我會以焗為主，頭盤係牛油果粒大蝦沙律杯，佢好鐘意食牛油果架，然後就整一個薯仔濃湯，阿琪唔多鐘意食飯，所以我決定整意粉，主菜方面就會有焗烤雞、烔魚，甜品就食我一早買左既蛋糕，我揀左鬆弛熊蛋糕，因為阿琪鐘意鬆弛熊，唔知佢見到個蛋糕會點呢？

呢幾樣野我都試左幾次，只要多人唔出差錯，就無問題，希望，阿琪佢會鐘意啦。



而家只係差一樣野，就係餐酒，有時同阿琪出去飲野，佢都好鐘意開一支白酒，所以，我決定搵一支我同佢都覺得好飲既白酒，但係我又唔記得叫咩野名，所以我是但搵左個借口，係慶祝既前一日，叫佢同我出去買白酒。

同阿琪慶祝生日既事，有幾個人知道，我親口講比佢地知既人有ＪＵＤＹ同能蟹，而唔係我親口講既，有阿富。

阿富有幾次同阿琪講叫佢唔赴我既約，但係阿琪點會聽，而ＪＵＤＹ同能蟹聽到我會點同阿琪慶祝後，都問我駛唔駛搞咁大壇野。

但係佢地唔會明，只要為左佢做既所有野，就算幾大壇，幾辛苦，只要佢最後對住你笑得好開心，所有野都覺得值得。

頭先都講過阿富好似想阻止我同阿琪慶祝，所以佢呢排都成日會約阿琪夜晚出去食飯，好似想係我同阿琪慶祝前，可以成功咁令到阿琪同佢一齊，但佢愈咁做，阿琪就愈反感。



而有一次，阿琪同我加上能蟹三個人出去飲野，呢排能蟹多左ＪＯＩＮ我同阿琪既ＤＡＴＩＮＧ，唔知佢係未想睇住我同阿琪會發展成點，因為佢同我打賭過果樣野。

不過，總覺我佢都有少少唔妥……

呢一次飲野，我地都講左好多自己既事，而阿琪都有同能蟹講，話我對佢好好，係無可能果隻好，唔知點解，我聽到阿琪咁講後，有少少感觸。

而飲飲下野，阿琪收到個電話，係阿富，佢知道左我同能蟹同佢一齊飲野，佢死都話要黎，其實多個人我真係無所謂，而且今日係能蟹佢有野想呻所以陪佢，佢覺我多個人黎無咩問題，而且佢不知幾想睇阿富黎到阿琪同我會點，佢條死仔擺到明係想食花生等睇戲。

由電話掛左唔到十五分鐘，阿富就到左，佢一到左係坐左係能蟹既旁邊，因為阿琪同緊我坐，其實我有一刻諗過讓個位比佢坐，但係佢話唔駛，所以我都坐返低。

佢一到就不停飲酒，好似唔想同我地傾計咁，而我就要睇住坐係我前面既能蟹，因為佢開始發酒癲，不停拎自己Ｄ錢周圍派，係啊！佢飲醉就會咁架拿！！！

然後就不停拎住支酒話要同我鬥飲，我都因為咁比佢整到有少少醉。

好唔容易先叫到能蟹坐低，坐低後我望一望阿富，佢今日同平時唔同，因為以前都有同阿富飲過野，佢唔係咁易醉既人，但唔知點解，今日既佢好似已經醉左，佢望住面前既阿琪一粒聲都無，而阿琪好似好唔好氣咁別個面，唔知係未頭先佢地吵過黎。



「我去一去洗手間。」阿琪講完後，我就讓左個位比佢去洗手間，剩低我地三個人，阿富就問我：「牛兄，你地成日出黎飲野架？」

我只係點一點頭，因為得真係比能蟹隊左都幾多醉……

「咁係未次次都會攬住阿琪架？」佢問我……咦……我頭先好似真係有攪住阿琪架ＷＯ。

「我問你係未次次都攪住阿琪啊！」阿富開始有少少唔妥，而我就問佢：「你係未飲醉左啊。」

阿富佢不停咁搖頭，然後一野咁打左落場玻璃度。

不過好彩，阿富唔夠力，只係傳左一下好大聲，而阿琪剛剛返到，佢問我：「咩事？」

「無事，妳放心……」我望住阿琪話，而阿琪就望住我問：「咁你有無事？」



「我？有咩事？無事啊……」我講完後就同阿琪四目光投，而佢都望住我無講野，就好似而家呢一刻，呢個世界入面就只得返得同佢咁。

我同佢既距離慢慢接近，直到我，我視線由佢雙眼移到佢既耳仔，到視線好接近耳仔果陣我就閉上眼，我聞到佢既髮香，呢一種髮香我成日都會聞到，係阿琪用開既果種洗頭水味，我感覺到鼻頭碰觸左係阿琪既臉蛋上面，嘴唇既感覺都係一樣。

我錫左阿琪塊面一啖，然後，我就眼前一黑，到我清醒返少少既時候，已經係身處一間Ｍ記既男廁入面。