[愛情無限loop] 就係咁，我做左女神一年既備胎: １５４　久違的快樂時光

不明不白咁能蟹就同我打賭，我唔會接受，但係佢就當左係真……

算，不嬲呢條友仔都係自己鐘意點做就點做，我先無咁多時間招呼佢，阿富既事我而家好煩，而家唔想再煩多樣野。

可能因為上次我無理過阿琪一陣，所以而家阿琪每次ＳＤ　ＭＳＧ比我，都會問我係未訓左或者係未忙緊，咁真，佢咁做幾可愛下。

雖然係夏天，但係阿琪好鐘意同我去打邊爐，吉野家果隻，佢話吉野家邊爐平又好食，所以有時我地諗唔到食咩，都會去食吉野家邊爐，而且每次都係佢搵位，而我去排隊買野食。

而阿琪每次打邊爐既野食，我一定記我，因為差唔多次次都係一樣。



我地兩個鐘意叫雞件，因為我同佢都係唔食牛既人，然後，會叫多個娃娃菜加金菇，因為阿琪好鐘意食菜，佢唔鐘意食豆制品，所以我唔會叫豆腐果Ｄ食物，如果果段時間有鯖魚既話，我會叫比佢食，因為佢鐘意食鯖魚，當然仲有菜肉餃啦，我同阿琪都好鐘意食，然後我地兩個都會叫粉絲，我每次都會最後先落，阿琪就會不停提我叫我快Ｄ落唔好又食剩，仲會話我落芝麻醬食好怪，有一樣野一定唔可以唔記得，就係泡菜，個傻豬好鐘意食泡菜，每次見到就會笑得好開心，而落完單後我就會拎幾包吉野家既薑入去個位比佢，因為阿琪好為食，等果陣要食住薑等，如果有時佢帶左生果出黎，仲會喂我食幾舊，然後我先再出去拎野食返黎。
呢個，就係每次我同阿琪打邊爐既情況。

今次都係一樣。

「你唔好又好似上次偷偷地放自己Ｄ雞落我個邊爐到啊。」佢次次都會咁叮囑我。

「咁我食唔晒，見妳有想食嘛。」我每次都係咁答返佢。

我好享受，我地小倆口一齊打邊爐既時光。



「係呢？我生日你點同我慶祝架？」阿琪食食下問我，我打左個突後嗆左一下話：「諗……諗好架拿。」

「係未架……」佢用一個好懷疑既眼神望住我，「你未諗可以直接講架ＷＯ。」

「點會未諗呢，真係諗好左架拿。」呢句係真心既，因為一直我都幻想同阿琪慶祝生日，所以要做Ｄ咩，大既都知道。

而食食下，阿琪就同我講：「阿富佢……都知道我生日。」

我向佢微笑左一下話：「咁都好啊，唔好咩？」



「唔會啊。」佢回答我：「佢話想同我正日果日慶祝……不過我拒絕左，叫佢唔好正日慶祝。」

「嗯。」我食住雞件點一點頭，而阿琪就繼續問：「咁……你係想我預邊日比你啊？」

我睇一睇部電話既日曆，指左個日期，「妳預呢個星期六比我好唔好？」

阿琪望左我指既日子，然後話：「生日前三日，點解係呢日既？」佢問，而我直接答：「咁我果日多Ｄ時間準備嘛。」

「你預成日架？」阿琪好奇咁問，而我諗左一諗就答：「妳夜晚出現就得，但我就要準備成日囉。」

阿琪聽到後好開心咁笑住話：「你搞到我好期待添。」

我聽到佢咁講，好有自信咁話：「緊係要期待啦，我同妳慶祝生日ＷＯ。」



佢好滿足咁笑左出黎，然而，笑左一陣呢個笑容慢慢收起，然後問我：「阿牛啊，呢排阿富成日叫我出街食飯，少陪左你，你會唔會唔開心啊？」

我聽到佢咁問後，答佢：「唔會啊，點解咁問？」

「我見你呢排覆我ＭＳＧ慢左，驚你係因為我同阿富出街所以唔開心。」哈，睇黎我學識左不動而動。

「邊有呢，妳諗多左拿，我呢排工作忙左，而且有時好專心搵同妳慶祝Ｄ野，所以唔記得覆姐。」咁呢個係事實黎架，雖然有時真係會特登唔快覆。

「係就好。」阿琪佢依然笑得好開心。