[愛情無限loop] 就係咁，我做左女神一年既備胎: １２９　時機尚未成熟

同ＪＵＤＹ只係掟左一局就返左去，因為我知道ＪＵＤＹ志不在掟鏢，而係想同我講頭先果一番說話。

返到去，我本來想行返最入個位，但係阿琪就話唔好咁煩，坐係佢旁邊就得，一坐低，就見到全部狗公都怒啤住我。

「點啊……」ＪＵＤＹ係我耳邊講。

「咩點啊？」我問返佢。

「無啊，想問下你比咁多隻狗望住有咩感覺姐。」ＪＵＤＹ話，然後我好識趣咁同佢講：「妳呢個笑話好好笑啊。」



大家都飲到差唔多，有幾個女ＭＥＭＢＥＲ唔係飲開既都不勝酒力開始發酒癲，有個不停係度又喊又笑，有個就不停追酒飲，有個就不停大叫大嚷，而有個仲搞笑，佢將我地買黎既薯片開左，然後倒左半支酒入去當栗米片食……

男既都唔好得去邊，開始想借ｄ意抽水，不過，正經果班人一早估到班狗公會咁，所以都好克制住自己唔飲咁多，係呢個時候，大家都各守本份，阻止住附近ｄ狗。

我當然係幫阿琪擋啦，ＪＵＤＹ佢就可以自己照顧自己，雖然佢已經醉左，不過佢醉左後既攻擊性仲強。

今次既酒吧之約，就係Ｄ狗公抽唔到水之下落幕，我、ＪＵＤＹ同阿琪坐同一部車返去，期間阿琪係後座照顧緊飲醉既ＪＵＤＹ。

「點解可以飲到咁醉架？」阿琪笑住咁問。



「可能，佢同ＣＯＷ一齊返後開心，未飲多左囉。」我答佢。

「如果係為左開心而飲酒，就由佢啦。」阿琪答，然後就繼續照顧ＪＵＤＹ。

送左ＪＵＤＹ返去，我同阿琪選擇慢步行返屋企，咁樣可以醒一醒ｄ酒氣之餘，我地兩個都可以單獨傾下計。

「好耐無咁開心飲酒拿。」阿琪好滿足咁話。

「妳平時唔開心架咩？」我問佢，而佢直接答我：「係架，我通常係唔開心先飲酒架，不過……」阿琪都飲得幾多下，所以佢腳步都有少少浮浮地，我扶一扶佢，然後佢話：「識左你之後，開心左好多，雖然，都發生左好多既事。」



我聽到佢咁講都笑左笑，「咁妳又真係幾多事發生既。」

「係架，係未開始覺得我好煩呢？」佢問我，雖然我知佢係講笑咁問，但我都好認真咁回答佢：「唔煩。」

扶住佢行左一段路後，我問佢：「頭先妳話，我係妳好好好好好朋友……」「係啊，你真係我好好好好好朋友，同你一齊好舒服。」

「咁……妳話唔排除我地會有進一步既關係……」我問，然後阿琪就望住我，「你衰啊你，成晚就係諗住呢Ｄ野。」

「我無啊，我只係……」「時機尚未成熟。」阿琪行前，繼續佢既腳步浮浮，「我仲有好多事情要處理，我唔想累左你啊。」

「如果Ｄ事，我都可以幫手既話，咁不如……」我都未講完，阿琪就差Ｄ跌親，我見到咁即刻上前扶住佢，同佢四目交投，「你唔會知道，我而家有幾多野煩緊。」佢眼神好認真，而且，帶住悲哀。

「咁可唔可以答應我，無論點，都比我係妳身邊？」我問佢，但阿琪無答我，佢只係笑左笑後企直返個人，繼續行得東歪西倒。