[愛情無限loop] 就係咁，我做左女神一年既備胎: １２８　ＬＯＷ　ＴＯＮ

由頭先到而家，我成個人都不在狀態，因為，阿琪果個答案，我見到佢由洗手間返黎既果一刻，望住我既微笑，呢一笑，使我更加心動。

但係當我再回憶返佢既答案，佢話唔排除會有進一步既關係……唔排除，可唔可以代表做仲係未到時候呢。

「好悶啊，阿牛，陪我去掟鏢。」ＪＵＤＹ係佢個位對住我大叫，而我就慢慢咁行左出去，到我行到出去既時候，佢再問阿琪：「妳去唔去掟啊？」

「唔拿，我都唔識掟，我坐係度傾下計。」阿琪話，所以最後得我同ＪＵＤＹ兩個人去左掟鏢。

係掟鏢既期間，ＪＵＤＹ同我講：「頭先阿琪講既答案，就係上次你聽唔到既答我。」



佢講完後，我一頭霧水咁望住佢問：「咩野上一次？」

「上一次我地三個玩ＴＲＵＴＨ　ＯＲ　ＤＡＲＤ果陣啊，你果日未飲左好多聽力有問題既，而係果陣我就問左佢一個問題，同剛剛阿琪被問既問題差唔多，而阿琪都係答同一個問題。」ＪＵＤＹ用力咁擲出佢手中既飛鏢，不過，鏢針插唔到鏢把，所以跌左落地下。

「所以呢？」我問佢，而佢一路瞄準一路同我講：「就係話，你而家依然有機會，但係佢仍然覺得你同佢之間，而家既狀態係最舒服。」佢又將手中既飛鏢掟左出去，今次中左，只不過係出左界。

「但我唔知點樣先可以突破現狀……」我同ＪＵＤＹ講。

ＪＵＤＹ再次瞄準第三掟，「要突破現狀，其實好難，因為阿琪已經習慣左，如果呢個習慣繼續放大，係好難去到一下個階段。」



佢擲出飛鏢，今次竟然比佢掟中左紅心，顯示特效既螢幕打出５０分既字樣，ＪＵＤＹ轉頭向我露出一個勝利既表情，然後又話：「希望你可以快ｄ打破呢個階段啦，因為你都唔想只係做阿琪一世既好好好好好朋友掛。」

幫ＪＵＤＹ收返佢所掟出果三支鏢後，輪到我掟，我企係準備線上面，瞄準住紅心，一發，ＩＮ　ＢＵＬＬ，「但係做左佢好朋友後，就唔可以做佢男朋友咩？」我問ＪＵＤＹ。

「無錯，係有好朋友最後會行埋一齊到男女朋友，但係過程要好耐下囉。」ＪＵＤＹ答我果陣，我已經準備好掟出第二發，都係ＩＮ　ＢＵＬＬ。

「等耐Ｄ我唔緊要，因為我已經準備追阿琪係個漫長既戰爭。」我一路瞄準我第三發，一路答ＪＵＤＹ。

「不過……唔知阿琪點諗呢？」佢話，呢句說話打亂左我既節奏。



「咩野點諗？」我問佢，就正當我準備掟出呢一發果陣，佢答我：「好朋友可以係一世，但係男朋友可能只得一陣，佢唔捨得開始，可能係因為唔想無左你呢一位咁好既朋友。」

飛鏢離開左我雙手，但係，ＪＵＤＹ呢一句既影響，令到我呢一發有少少遍差，只係中左ＢＵＬＬ旁邊上１分既位。

ＬＯＷ　ＴＯＮ既字樣打左出黎，呢一局我掟左１０１分。

ＪＵＤＹ望一望我，「阿牛，你真係甘心只係做阿琪既好朋友？」

呢個問題，我想答唔係，但係呢個時刻，我答唔出口。