[愛情無限loop] 就係咁，我做左女神一年既備胎: １２７　酒吧之約

係機場果一幕後，我有問返ＪＵＤＹ點解會選擇同ＣＯＷ一齊，而佢就話諗過好耐，都係覺得ＣＯＷ對佢咁好，點解佢仲要揀Ｂ男，而我再問佢點解以前唔係咁揀，佢就答我，可能，人係失去過之後，先會明白擁有果陣既好處。

然後，佢再三同我講，就係因為咁佢鐘意有返對ＣＯＷ既感覺。

我將佢地兩個既事話返比老牛大人聽，佢都好欣慰咁話：「身邊有一個識得諗既朋友，先會幫到佢地愛情既成長。」

唔知老牛大人係未讚緊我呢？

ＪＵＤＹ既事終於完結，ＣＯＷ係第一日到步已經寄左明信片比佢，ＪＵＤＹ亦都成日係我同阿琪面前曬ＣＯＷ送比佢既明信片，見到佢個樣咁ＳＷＥＥＴ，我同阿琪都替佢開心。



而今日……

阿琪：記得今晚準時放工啊
我：知道拿
阿琪：最後估唔到會有咁多人出黎
我：我都估唔到
阿琪：有咁多人去
阿琪：（開心）

最後約左跑ＧＲＯＵＰ既人今晚去飲野，同阿琪講既一樣，真係估唔到會有咁多人出席，當然啦，阿琪出黎，好多狗公都到，而且今次阿富都會黎。



數落，大大話話都有１０幾個人。

我地揀左一個比較近大家既酒吧，希望大家今日可以玩得開開心心。

時間好快就到左酒既既約會，我、ＪＵＤＹ同阿琪都約左地鐵站等齊人先去，當到達後，見到本來好靜既佢地，突然間興奮晒。

因為今日既阿琪，著得又真係幾靚。

「阿琪終於都到拿！！！」班狗公既歡呼，整到阿琪好尷尬，而且佢地仲不停叫阿琪坐係佢地既旁邊，佢望一望我想求救既時候，可能班狗公一早就計劃好……「阿牛，呢到個位留左比你架。」



我望一望我坐既位，再望一望佢地想坐阿琪既位，可以話係一個坐頭一個坐尾，但係佢地咁講到，想改變已經黎唔切。

坐低左，班狗公更加癲，不過好ＪＵＤＹ同阿琪一齊坐，所以班狗公既招數都起唔到咩作用。

坐係我附近既人有阿富、金姐、菜老闆同埋一個比較熟既跑友。

「頭先你地未黎，全臺人不知幾靜。」金姐同我講，而我望一望已經比好多女ＭＥＭＢＥＲ圍緊既阿富，就答佢：「係咩？我覺得應該好熱鬧ｗｏ。」

菜老闆聽到我咁講後就笑住講：「佢地係因為見到有勁敵先咁做咋。」

勁敵？菜老闆示意我望去阿琪果邊，哦……原來佢所講既勁敵係阿琪。

不過經過上次同阿富打賭後，阿富已經無再煩阿琪，但係佢仲諗住同阿琪一齊？不過佢仲拍緊拖架ｗｏ。



唔好諗咁多，今日黎到係想開心玩一玩，就盡情咁去放鬆下，而且阿琪而家有ＪＵＤＹ睇住應該無事，所以我都無太理會佢地果邊。

飲到咁上下，阿琪又提意玩果樣野……係啊，又係ＴＲＵＴＨ　ＯＲ　ＤＡＲＥ……

班狗公聽到後不知幾咁雀躍，因為佢地覺得有機會問阿琪我密既野，但係事與願違，佢地整唔到阿琪輸不特止，仲比阿琪同ＪＵＤＹ反玩左佢地。

但成晚留留長，始終都會有機會齊到阿琪輸，不過好彩既係，發問權落左係金姐度。

全部人都好期待金姐會問阿琪ｄ咩野，不過我就無咩期待，因為平時阿琪咩都同我講，佢以前細過既野我都差唔多知道晒，所以無咩野我係唔知。

但係，金姐以下所問題野，係我唯一比在場既人更在意。

「阿琪，如果阿牛佢再靚仔ｄ，妳係唔係會同佢係埋一齊？」金姐既問題一出，大家都無度起哄，而我，就呆左諗緊呢個問題。

第一點，咩叫我靚仔Ｄ……我已經個樣好唔店咩！？雖然我都有少少覺……



第二點，會唔會同我一齊！？呢個問題我成日都想知，只不過係阿琪話未諗住拍拖，所以我覺得佢會答唔想住。

所有人都等緊阿琪既答案，而坐係佢旁邊既ＪＵＤＹ就笑得好耐人尋味，同我對到眼果陣，仲笑得更耐人尋味。

然而，阿琪終於講出左佢既答案：「我同阿牛而家係好好好好好好既朋友，唔排除會有進一步既關係。」

我終於知道咩叫正中紅心既感覺，就係呢一下，ＪＵＤＹ佢對住我笑緊，但我唔在乎，班狗公對我目露兇光，但我唔在乎，阿富佢露出左一副落莫既表情，但我唔在乎。而家呢一刻，我只係望住阿琪，而佢有少少怕羞咁話，「我要去一去洗手間。」

同佢對到眼，感覺唔同左，而我，就係呢個感覺下輸左都唔知，而且仲迷糊地選擇左ＴＲＵＴＨ。

坐係我面前既跑友問我：「係個跑ＧＲＯＵＰ度有無鐘意既人啊？」

而我好直接咁答左：「阿琪。」