[愛情無限loop] 就係咁，我做左女神一年既備胎: １２３　剛剛遇著巧合

我扶住飲醉左既ＣＯＷ係大街上行緊，係未失戀一定要飲醉架，我失戀果陣都無，咁我算唔算係浪費左一次醉既機會。

「喂，你當幫幫忙比ｄ力水企好ｄ好唔好？」佢成個人既力聚晒落我到果下真係唔多頂得順，就係呢個時候，一個路人行左過黎問我：「駛唔駛幫手啊？」

「我得架拿……」本來都無諗過叫呢位路人幫手，但當我望到呢個路人既樣，嚇左一跳，「一個人扶個醉既好煩架，我幫你啦。」佢一講完就過左黎幫我，「你個朋友都幾重架ｗｏ。」

「係……」我好尷尬咁答佢，因為，呢個路人就係Ｂ男！！！有無咁撚好彩啊！

好彩ＣＯＷ佢醉左係唔會講野，如果佢不停咁叫住ＪＵＤＹ個名都唔知點算。



不過而家既情況都已經夠尷尬。

「做咩事搞到咁啊你朋友？」Ｂ男問。

「算係失戀掛。」我答返佢。

「車～女死女還在，駛鬼咁咩。」聽到佢咁講唔知點解有少少火起。

「無既，佢條女同另一個男人搞都唔同佢搞，佢未想分手囉。」我又話。



「個女都幾仆街ｗｏ。」Ｂ男呢一句又令到我怒火上升左少少。

「係咩，咁都要另一個男人係仆街搞９佢條女先有今日既局面。」我又話。

「咁又係，總之兩個都係仆街。」拿，你咁講就岩，咁你就唔快ｄ死去仆街。

「如果我係你個朋友，我一定會郁９個男，然後大巴大巴打條女。」你講得無錯啊，我都好郁９你架其實。

就係呢個時候，ＣＯＷ無啦啦甩開左我地兩個，然後話：「係啊！應該郁９佢！應該郁９佢！」佢企又企唔穩，口仲不停嘔出少許既野。



「喂，你個朋友好似唔係幾……」個Ｂ男呢句都未講完，ＣＯＷ就打左佢一拳，我都比佢呢個舉動嚇左一跳。

「你個仆街！搞９我條女！」ＣＯＷ一拳一拳咁打落Ｂ男到，而Ｂ男想反駁但係竟然反駁唔到，比發酒癲既ＣＯＷ騎住不停打。

而係旁邊既我，就不停忍緊笑，因為真係太好笑拿，都唔知係個天上比個機會ＣＯＷ發泄定點，又會安排個Ｂ男黎幫我扶佢都有既，最緊要係Ｂ男話如果佢係ＣＯＷ就一定打撚死果個男人，然後ＣＯＷ就發酒癲起勢咁打佢。

呢個真係剛剛遇著巧合，我係旁邊見住真係笑到個心勁涼。

「喂！你仲笑！快ｄ黎幫手啦！」Ｂ男叫我幫佢手，但我決定將個真相話佢知：「而家打你果個人係ＪＵＤＹ條仔，又係你頭先話兩個都係仆街，打撚完個男既就大巴大巴打條女，咁我個朋友而家未打你先囉。」

Ｂ男聽完我講之後成個人呆晒，係無奈既呆。

「喂！前面點解打架！」正義既朋友終於出現。

「ＣＯＷ！走啊！有警察啊！」我行過去捉ＣＯＷ走，但係佢掛住打Ｂ男，最後，比Ｄ警察捉左。



就係咁，我地三個比警察捉左車左返差館……