[愛情無限loop] 就係咁，我做左女神一年既備胎: １２２　男人哭吧不是罪

ＣＯＷ聽完我呢兩個字之後，竟然係笑左出黎，係一種帶有可恥既笑，「你話係未好矛盾，我想做返自己係因為想放低佢，但我而家竟然掛住佢。」

可恥既笑容下，慢慢被淚水掩蓋，ＣＯＷ而家係我面前一路笑又一路喊，佢笑自己既矛盾，喊自己既無奈。

我拎出左一張紙巾遞比佢，佢接過左紙巾後就話：「我真係好無用，我真係好無用，我真係……」

「點解無用？」我問佢，然後佢忍住喊望住我答：「我竟然為左一個女人喊成咁。」

「為左一個女人喊成咁，就叫做無用？」我又問佢：「點解你會覺得，咁樣做係無用？」



ＣＯＷ比我問到呆左一呆，然後答：「因為……我係男人……所以……」「你未ｏｎ９啦。」我話佢：「愛情係無男女之分，邊個話分左手後，男人就唔可以喊，邊個話女人就一定係比人照顧果個，愛情係關於兩個人之間既感情，如果好似你咁講，咁同性戀果ｄ人點啊？ｈｅｈｅ果ｄ人分左手就唔比喊既？女女果ｄ人分左手就喊到仆晒街既？」

ＣＯＷ仲係呆左咁望住我，而我就話：「想喊既話，未喊囉，唔好理係未男人定女人，你只要知道一件事，你係個人，你就有權利係你最唔開心既時候喊。」

ＣＯＷ佢無力咁坐住，拎起樽啤酒倒落自己既杯到，但倒倒下佢又放低左樽酒，用手擦走自己既眼淚，一路笑，一路擦，佢又再拎起樽酒繼續倒，但今次就倒到一半就停左，因為，佢再也忍唔住，放聲痛哭。

我望住佢微笑左一下，呢下微笑，係因為佢終於嘗試將自己既情緒釋放出黎，仲有既，係帶住憐憫既笑。

「我……我……我好掛住……」佢喊到連一句說話都講唔到，但我好明白，睇得出，佢真係好掛住ＪＵＤＹ。



佢就係咁喊左半個鐘頭，我亦都就咁坐係度望住佢喊足咁耐，我地兩個都無理身邊既人點睇我地，而佢喊完之後，就拎起我比佢既紙巾，擦一擦眼淚後再深呼吸左一啖。

「舒服ｄ未？」我問佢，而佢點一點頭。

我睇一睇部電話，未收到阿琪既ｍｓｇ，姐係仲未知道佢同ＪＵＤＹ傾成點，

「跟住你會點做？」我問ＣＯＷ。

「我……都唔知。」佢答我。



「唔知唔緊要，唔急，我地今日就好好將所有情緒發泄就得。」我拎左果杯佢自己倒既啤酒比佢。

「好。」佢答我，然後將果杯啤酒飲晒。